迎男人40 夢想以啡會車友

「人生有幾多個10年！」這句對白雖然用得太濫，但套在黃金寶身上最適合不過。還有3個半月，「阿寶」就滿40歲，他說會把「男人40」當作新開始，最大心願是跟恩師沈金康「學多10年嘢」，更夢想退休後開Coffee Shop，「以啡會車友」歎世界！

笑別「黃金22年」車手生涯，「阿寶」即將轉執教鞭迎接新挑戰：「40歲代表人生另一個階段，亦係我喺單車事業新起跑線，希望嚟緊10年，或者最少5年，可以喺沈教練身上再學吓嘢，因為佢嘅思維，策劃安排能力都好值得借鑑。」看來這對「金」牌師徒間的「承諾」還要守下去！

唔想得一個接班人

「車神」光榮「封轆」，大家都期待有「第2個黃金寶」出現，但「阿寶」眼光更遠大：「唔想只得一個人接我班，將軍澳單車場明年啟用後，整體發展會更好，香港單車應該要百花齊放，每個項目都培養出領軍人物同一批實力車手，喺世界級賽事有得同人Fight。」

他又寄語後輩要把握機會：「依家運動員有好好嘅硬件支援，不過生活來得不易，佢哋喺溫室成長未必係好事，我只希望大家珍惜眼前一切。」

最怕靠個名搵着數

香港近年掀起單車熱，以黃金寶的名氣，如果開單車店或單車學校一定客似雲來，偏偏「阿寶」最怕「靠個名搵着數」：「暫時冇諗呢啲嘢，亦唔想乜都向錢看，我會Keep住做教練先，或者等10年、15年後退咗休，會開間Coffee shop，入面賣埋單車嘢，同朋友坐低傾吓計，呢啲生活先令我最嚮往。」