體操美男抵港低胸冧Fans

倫敦奧運一炮而紅嘅德國靚仔體操運動員尼古恩（Marcel Nguyen），尋日同家人以及女友抵港，開始一連7日嘅旋風式訪問。佢行出機場時身穿一件闊領低胸tee，冧到現場女Fans暈得一陣陣。

家姐想上山頂睇夜景

尼古恩係越南同德國混血兒，佢代表德國出戰奧運之後，就成為世界各地女Fans寵兒，連前港姐李珊珊都為佢發咗條微博熱烈歡迎佢嚟到香港。尋日赤鱲角機場吸引咗幾十位Fans，當中佔咗9成係女性。雖然等行李等咗成粒鐘先出嚟，但個頭Gel到行一行嘅尼古恩就冇令人失望，佢身穿一件超低胸tee露出胸前紋身，一見到Fans就露出殺死人嘅笑容，之後簽名合照絕無托手（月爭），認真識做，之後佢受訪時話對熱情嘅香港Fans感到好意外：「好開心可以嚟到香港，我真係無諗過自己會有咁多Fans。」

為咗幫尼古恩宣傳，佢家姐Denise專登走去學中文，幫細佬開咗個微博，仲話希望今次有機會一家人上山頂睇夜景。至於尼古恩嘅女朋友Alexa亦有同行，不過就好怕醜唔想接受訪問。各位Fans如果想近距離接觸呢位靚仔，呢幾日就要Mark實佢嘅行蹤喇！