佐敦露兩手醒過班後生

49歲「波神」出山救亡！東岸隊伍山貓近期狂輸，老闆米高佐敦「睇唔過眼」，昨日親自落場傳授「神技」，久違了的Fadeaway重現眼前，表現比謝勒軒達臣及榜眼基爾基士堤等後生仔更Sharp醒，連中鋒比約保都講笑叫佐敦復出！

未計今早鬥快艇，山貓最近已經連輸8場，管理層已啟動緊急應變措施，先有總裁洛希堅斯裁走表現不佳的親生仔哥利，繼而輪到教練鄧普洛轉陣出擊，豈料連老闆「波神」亦要出動！佐敦昨日一身運動Look出席山貓操練，起初只於場邊督操，眼見一班契仔「唔多掂檔」，竟親自落場露兩手，惹來大批記者及球員圍觀。

Fadeaway招牌射姿重現

明年2月就50歲的「波神」身形未有大走樣，甫落場就與隊長謝勒軒達臣玩One On One，並施展渾身解數使出招牌式Fadeaway及「遮住半邊波」出手等標誌性射姿，招招都是陪伴着各位籃球躉成長的殺着。「波神」之後再單挑應屆榜眼基爾基士堤，跟手就教特魯斯湯馬士及比約保步法及背籃功，身為班主一樣毫無架子。

訓練結束後謝勒軒達臣向傳媒表示：「我哋冇計分，但比數應該差唔多，米高依然擁有得分能力。」至於中鋒比約保就最識擦鞋：「老闆仲好Fit，依家復出應該仲打得！」隨着謝勒軒達臣傷愈，山貓戰鬥力提升了不少，加上有「波神」傳授秘技，試問一班手足又點可以令老闆失望，明早造訪鷹隊照計有得鍊，受讓6.5分要下盤。