「火箭柏金」韋特情緒失控狂發百段留言狂噴記者

阿仙奴名將柏金雖患有飛行恐懼症，但職業生涯依然光芒四射，相反同病相憐的火箭新秀韋特則崎嶇滿途，繼早前公開批評會方後，昨晨又失控狂發過百段留言頂撞記者，連環辣着米飯班主及傳媒，韋特「飛唔起」職業生涯隨時玩完！

韋特本年1月接受《ESPN》訪問時自爆患有飛行恐懼症，跟手無故缺席球隊媒體日及首天訓練營，之後又要求火箭為其安排大巴出席客場賽事。縱然會方對其無微不至，但韋特依然炮轟火箭「講一套做一套」，斥責會方未有盡力幫助他克服焦慮症。

或被會方放逐到發展聯盟

美國著名記者Adrian遂撰文批評韋特：「職業體育係殘酷，韋特根本唔值得火箭浪費第16順位選秀權同關懷，最重要係韋特將自己塑造成受害者，如果佢有咁多怨言，不如準備結束NBA生涯。」

眼火爆的韋特昨晨情緒失控，透過twitter一口氣轉發過百條Fans的留言支持訊息，並向Adrian駁火還擊：「仲話自己係新聞工作者，Adrian報道嘅根本唔係事實，一啲根據都冇，我會一路(目及)實你嘅報道。」韋特今季仍未為火箭披甲，兼且情緒有問題，消息指會方已準備將前者下放到發展聯盟。

火箭明早會於主場恭候速龍，主帥麥希爾愛女Sasha昨晨病逝，終年23歲，預料麥帥未來幾仗都無法領軍，林書豪承諾會努力打好波令麥希爾放心，火箭主場讓4.5分照撐上盤。（now678台周三早上9:00直播）