摩利士Twins孖住上位

肯薩斯雙子星閃耀籃壇！NBA兄弟幫勢力逐步擴大，加素兄弟固然被視為最成功例子，盧比斯兄弟亦站穩陣腳，但講到「最啱Key」就肯定非摩利士兄弟莫屬！這對「Twins Tower（雙子塔）」不單外形及品味夾到飛起，就連新季「起雙飛」的劇本亦似到十足十，即使二人効力不同球隊，卻依然一條心追逐全明星夢！

紋身買衫乜都一樣

摩利士兄弟來自單親家庭，據二人母親Angel向《亞利桑那共和報》透露，兩兄弟自幼喜歡點同樣食物、聽同樣音樂、紋一樣的紋身圖案、購買同款同色座駕，即使踏足NBA後分道揚鑣，早7分鐘出世的哥哥馬基夫効力太陽，胞弟馬古斯在火箭搵食，但二人早前分別在鳳凰城及休斯敦買外套都可以撞衫，足證兩兄弟心有靈犀。

以「離別90年」來形容去季分隔兩地的馬古斯，今夏與馬基夫回歸母校肯薩斯大學狂操體能，並聽從火箭教練麥希爾建議學打小前鋒位置，新季無論得分、籃板、助攻及3分投射數據均全面提升；至於哥哥馬基夫更獲太陽教練根特利委以重任擔正，近兩仗分別攻入19及23分成為贏波功臣，這對孖生兄弟齊齊起飛。

兩兄弟新季表現脫胎換骨，馬基夫稱全靠暑假休季時日日食媽媽Angel炮製的愛心意粉及烤雞，馬古斯就表示要答謝哥哥：「佢（馬基夫）睇晒我每場波，我哋日日都會互發短訊同傾電話，馬基夫會指出我有咩不足，我亦都會畀番啲意見佢，希望大家都會步向成功，有朝一日齊齊參加全明星賽係我哋嘅夢想！」

出生日期：1989年9月2日（23歲）

身高/體重：6呎10吋/111公斤

位置：大前鋒

効力球隊：太陽

過去兩季場均數據

12/13球季：9.7分、4.7個籃板、1.2次助攻

11/12球季：7.4分、4.4個籃板、1次助攻

出生日期：1989年9月2日（23歲）

身高/體重：6呎9吋/107公斤

位置：小前鋒/大前鋒

効力球隊：火箭

過去兩季場均數據

12/13球季：9.3分、4.6個籃板、0.8次助攻

11/12球季：2.4分、0.9個籃板、0.2次助攻