傅家俊除夕做老竇

恭喜Marco除夕做爸爸！香港桌球「天王」傅家俊，昨晚透過微博宣布與愛妻Shirley下月榮升第一任嗲哋、媽咪，並上載一張二人溫馨「大肚照」晒幸福：「一個多月後我們將會第一次當父母，今天微笑做個紀念！」Shirley預產期為12月31日大除夕，將會誕下「小公主」，Marco坦言開心、緊張又期待！

Shirley英國分娩生B女

去年5月結婚的傅家俊，即將迎接人生新一頁，他昨透過長途電話表示：「我之前覺得有啲忐忑，比起結婚嗰時緊張得多，以前打波嗰種驚簡直濕濕碎！始終都係第一次做爸爸嘛，係改變一生重要時刻。後嚟睇見Shirley佗得都OK，個人先定番啲，依家我甚至當咗打比賽係減壓方法呢！」他又補充：「生仔生女都冇所謂，最緊要係BB健康快樂。」

比起傅家俊，Shirley淡定得多：「我一切都好好，唔算太辛苦，食得又瞓得！」傅太將在英國分娩，Marco屆時亦會陪產：「好彩老婆生之前，我都唔使飛去第二度打波，可以好好照顧佢。」