杜蘭特升呢全能王

杜蘭特場內場外一樣全能！雷霆球星杜蘭特周身刀張張利，最近進軍商界及音樂界都搶盡風頭，旗下星級食府正式動工做硬俄城新地標之餘，夥拍「船長」史堤芬積遜出碟Rap歌又大獲好評；場內就取代占士夏登工作力谷助攻數字，新季勢要超越勒邦占士爭逐生涯首個MVP寶座，由「得分王」轉型做真正「全能王」！

開餐廳打造俄城新地標

3屆「得分王」杜蘭特最近忙到甩轆，上月獲俄克拉荷馬城政府批准於布克頓區興建餐廳後，便埋頭苦幹度掂靚菜單，日前聯同合夥人賀根及史密夫進行動土儀式時，已度好包括烤雞串燒、炭燒蟹肉鯰魚、煙熏牛肋骨雜錦飯等招牌主菜。

據《俄克拉荷馬人日報》透露，KD去年得悉紐約人大前鋒史杜迪米亞搞餐廳搞得有聲有色後非常羨慕，今次不單止希望杜蘭特餐廳的露天設計成為俄城新地標，更計劃親自試勻每款菜式，實行將心血打造成當地星級食府。

Rap歌唔受鄧肯玩

KD表示新餐廳會成為雷霆隊友的「主場」飯堂，以球星效應增加人流。KD準備於飲食界大展拳腳，剛進軍音樂界亦打響頭炮，早前與馬刺老將史堤芬積遜聯手出碟獲美國樂評人激讚，連「船長」亦對杜蘭特讚不絕口：「起初鄧肯都話想齊齊Rap，但我唔畀佢加入，因為呢隻CD唔係玩玩吓，我想搵真正有音樂天分嘅人齊齊做音樂，杜蘭特夠晒資格！」

助攻數字急升

場外周身刀張張利，場內亦一樣全能。自從好拍檔占士夏登投奔火箭後，杜蘭特新季明顯參與更多鋪橋搭路工作，昨日就貢獻23分、17個籃板及7次助攻帶領雷霆主場以106:92擊敗拓荒者，打開新季勝利門之餘，今季場均助攻數字已急升至6次。去季占士以場均27.1分、7.9個籃板及6.2次助攻勇奪常規賽MVP，查實杜蘭特無論得分及籃板都較「大帝」優勝，唯獨助攻偏少成為失落MVP寶座的主因。

適逢純射手奇雲馬田來投，KD大把機會做助攻，新季比「大帝」更全能兼奪MVP絕不出奇。成功開齋的雷霆明於主場恭候鷹隊，客軍自祖莊遜離隊後踏入重建時期，睇怕難以抵擋雷霆的進襲，雷霆讓4.5分捧上盤。（now678台周一早上8:00直播）