紐約人抄老餅奪冠方程式

家有一老如有一寶，家有多老又有何法寶？今夏狠心放走林書豪的紐約人新季「煲老藕」，一口氣簽入傑特、甘比及拉舒華萊士等沙場老將，以32歲零240日的平均年齡刷新NBA史上至老餅紀錄，主帥活臣似乎相當信邪，希望靠老將複製14年前的總決賽之路。

「A米」抖1個月 安東尼做替工

對上一個NBA老餅紀錄同樣由紐約人保持，97至98球季紐約人以高齡姿態導演「黑8傳奇」好戲殺入總決賽，如今活臣就照辦煮碗，翻炒這條「老餅方程式」：「如果上陣時間分配得好，我覺得年齡唔係咩大問題，傑特同拉舒華萊士嘅豐富季後賽經驗係紐約人嘅爭標關鍵。」

活臣的如意算盤能否打得響要拭目以待，不過這支東岸隊伍未開波已經收到壞消息，大前鋒「A米」史杜迪米亞因右膝受創將缺陣1個月，肯定無緣開鑼戰鬥籃網的紐約「打吡戰」。之不過陣中王牌球星安東尼就揚言未驚過：「倫奧期間我都出任過4、5號位，要我客串都冇問題。」至於今季回巢頂替林書豪的費頓，於10至11球季打出代表作貢獻場均17.1分及9次助攻，今次重返福地當然想再闖高峰。