狂迷累事塞內加爾手尾長

非洲盃再爆暴亂！昨晨舉行嘅2013年非洲盃外圍賽次回合，主場嘅塞內加爾球迷眼見愛隊出線無望，竟然惱羞成怒掟雜物入場，又喺看台上面燒國旗同埋報紙，咁都未算，呢班狂徒仲離譜到攻擊科特迪瓦Fans，兼夾衝入球場意圖襲擊「大象國」球星杜奧巴，最後球證喺76分鐘腰斬賽事，睇怕塞內加爾足總大把手尾跟咯。

高官死撐：得10人受傷

科特迪瓦喺首回合已經領先塞內加爾4:2，今鋪佢哋作客繼續發威，憑申花球星杜奧巴喺下半場梅開二度，將兩回合總比數拉開至6:2，好衰唔衰，就係因為比分太懸殊，搞到塞內加爾班Fans明知打氣都冇用，於是留番啖氣去搞事！

呢班暴徒先係掟石頭、酒樽同燒國旗呢啲指定動作，整整吓變本加厲，連科特迪瓦球迷都慘變人肉沙包！仲有人衰到衝入場想打杜奧巴，好彩被保安制服。球證喺76分鐘見唔對路，終於肯腰斬球賽，擾攘40分鐘後，賽會再決定取消比賽，班球場保安如臨大敵咁護送球證同「大象國」球員走人，仲要派埋專車接載300名客軍球迷去安全地方。

事後塞內加爾體育國務大臣馬力加高表示，呢單嘢「只係」令到10人受輕傷，當中有個仲包括佢自己喎。點都好，非洲足總話明會密切跟進事件，塞內加爾被罰輸波同取消幾次主場資格肯定係最低消費。尋晚曼城官網亦宣布，有份代表科特迪瓦嘅托尼兄弟安然無恙。