膝傷好番晒林瘋剷爆黃蜂

「林瘋」歸位率火箭錄兩連捷！今季轉戰休斯敦的林書豪，昨日為火箭上陣23分半鐘就貢獻9分及7次助攻，表現明顯比首仗更具侵略性，多次剷籃搏Foul都甚有去季於紐約人「瘋」狂時期的影子，證明膝部傷勢已完全康復，最後亦率領火箭主場以95:75大炒黃蜂！

角落Locker位就採訪

頭3節都有上陣的林書豪全場6射2中，手感雖然只屬一般，不過多次突破分波甚至剷籃都搞到黃蜂內線風聲鶴唳，第3節一次上籃更逼到黃蜂中鋒羅賓盧比斯用超技術撞低。賽後J.Lin表示：「我冇諗過跌得咁嚴重，當你遇到這種大動作犯規時會有點錯愕，但我已經歷過，唔係咩大件事。現時我嘅感覺愈來愈好，我已經慢慢搵番比賽節奏，同隊友亦都開始產生化學作用。」

據悉，林書豪於豐田中心更衣室的Locker位被安排在角落，美媒透露此舉乃火箭會方意思，有利將大批訪問J.Lin的傳媒控制在角落範圍，以免導致更衣室水洩不通。火箭將於周一凌晨主場恭候馬刺，屆時J.Lin會與柏加對撼，力爭季前賽三連勝。至於去季因借梳化給J.Lin瞓而上位的菲爾斯，新季轉投速龍後已奠定正選席位，昨日更協助球隊以82:75擊敗活塞。