蘇媽眼中的偉仔

記：記者　

蘇：蘇媽媽

記：蘇媽媽，可唔可以講吓偉仔嘅性格？

蘇：佢係一個乖仔，自小謙虛，對人恭敬，不過，佢都會有堅持，只要佢覺得啱嘅、要爭取嘅，佢一定會同你討論到底。

記：妳話佢好孝順，可唔可以再形容吓呢？

蘇：每年母親節佢都一定同我食飯，佢知我好鍾意鄧麗君，有次買咗一套四隻嘅CD送畀我，細個時佢兩兄弟會做手工卡，長大就同我食飯飲茶，其實母親節係一個形式，孝順嘅話日日都係母親節啦！

自細懂事唔扭買玩具

記：偉仔細個鍾意玩乜嘢玩具呢？

蘇：佢自小已很懂事，知道家境清貧，好少扭買玩具，記得細佬細個試過要買玩具，佢會話番細佬，有得玩咪得囉，佢好珍惜啲玩具，玩完就會執番好。佢細個最喜愛玩一個玩具鐘，拆完又再砌番好。

記：妳有乜嘢撚手小菜係偉仔最鍾意食o架？

蘇：我整嘅黑椒牛扒，我會買牛柳，可能係鎖水鎖得好，點樣鎖得好？哈！我自己都唔知，都係普通醃料啫，再落些少黑椒，佢好鍾意食。