咸美頓阿倫素攬炒 畢頓比利時站封王

F1經1個月多竭暑後昨於比利時重燃烽火，起步後第一個彎即「炒到飛起」，兩大巨星法拉利「車神」阿倫素及麥拿侖「黑帝」咸美頓齊齊上岸，最終另一「銀箭」英國車手畢頓憑藉排頭位之利，繼澳洲揭幕戰後捧走個人今季第2冠。

黑帝怒找哥斯贊晦氣

賽事假斯帕賽道上演，甫開賽就有嚴重事故，威廉士的馬當拿度有「搶跑」之嫌，轉入第一個彎角時，蓮花的哥斯贊為阻擋後車出現失誤，跟咸美頓發生碰撞後，整部戰車凌空「兜頭」飛剷過阿倫素，後者亦被炒出賽道，多輛戰車撞到支離破碎，安全車立即出動，包括阿倫素及咸美頓等5位車手被迫退賽。「黑帝」棄甲後嬲到爆炸，上前找哥斯贊理論，要由工作人員勸開。

比賽重開後，為麥拿侖第50場上陣的畢頓，一直Keep住頭位資格，且不斷造出快圈，結果由頭帶到尾以1小時29分08.530秒，征戰12年首次揚威比利時站，第10位起步的維度爾殺上亞軍都算難得，「冰人」拉哥倫則保季席。阿倫素即使一分都冇，但仍站穩車手榜「一哥」位，維度爾落後24分排第2。眾車手一周後（9日）轉戰意大利再演激鬥。