英單車雙金情侶係咁咀 碧咸睇沙排變電燈膽

英國「3大才子」睇沙排，布景板碧咸輸晒！昨晨上演的女子沙排決賽，場內比堅尼女將艷光四射，觀眾席亦星光燦爛。「萬人迷」碧咸、倫奧兩金得主積遜堅尼及哈利王子均是座上客，英國3大「男神」吸引力本應旗鼓相當，偏偏倫奧「單車新女神」羅拉卓治全程黐住哈利王子，又同積遜堅尼公然咀嘴，令碧咸慘變布景板。

飲啤酒撩哈利王子傾偈

碧咸靚仔有型、哈利有財有勢、積遜堅尼前途無限，畀着你會點揀？前日贏得今屆個人第2面金牌的英國單車新女神羅拉卓治，有幸獲「3大才子」陪睇沙排，這名20歲新貴大玩左右逢源，先撩哈利王子傾偈，一邊飲住價值4.3鎊一杯的啤酒，一邊與王子細聲講大聲笑，氹得哈利非常開心。

戀情首度曝光傳媒喪影

後來哈利王子率先離開，羅拉卓治即「把握機會」與同樣在倫奧奪得兩金的單車隊友積遜堅尼Sweet Sweet，兩人情到濃時更公然嘴對嘴「錫錫」，懶理碧咸一家人正正坐在前一排！羅拉卓治與積遜堅尼這對「雙金情侶」戀情首度曝光，英國傳媒當然瘋狂拍攝接吻「證據」，可憐碧咸卻淪為電燈膽兼布景板，阻住記者影相！

事實上，碧咸全程備受冷落，除了應觀眾要求與羅拉卓治、積遜堅尼等來個大合照外，其餘時間幾乎被當透明。冇癮碧咸惟有與3個兒子布魯克林、羅密歐及告斯玩耍作樂。「萬人迷」繼被英國男足放棄、開幕式做二打六後，再一次成為奧運布景板，認真慘情！