鬥牛兵如願反輸避夢10

奧運男籃8強今晚開打，西班牙放水戲爛尾收場避「夢10」！被視為美國爭金唯一勁敵的「鬥牛兵」，昨晨鬥巴西完全「唔連戲」，末段收起主力、故意「炒粉」、零犯規樣樣齊，最終「如願」以82:88反勝為敗篤定小組第3名出線，決賽前避免硬撼「夢10」，但就遭8強對手法國向國際籃球總會打小報告，看來有手尾跟；至於衞冕的美國男籃昨日就化身平民搭火車，擺明對淘汰8強對手澳洲志在必得！

8強對手法國不滿投訴

賽前已盛傳會故意輸波走線的西班牙，昨晨明明強陣出擊兼佔盡優勢，不過教練史卡列奧路竟於第4節明目張膽放水，不單收起一對正選孖寶卡特朗及費南迪斯，就連合力轟入45分的加素兄弟亦坐足大半節冷板，閃電式將10分領先優勢化為烏有。

西班牙眾將亦疑似收到「柯打」，完場前兩分半鐘竟然零犯規，任由全場攻入23分的巴西王牌巴保沙魚肉，最終「如願」以6分之差輸波，以B組第3名躋身8強「潛服」下線，決賽前都不用硬撼「夢10」。賽後西班牙《阿斯報》「睇唔過眼」，批評「鬥牛兵」於末節幾次投籃都刻意射失，防守更形同虛設。

以控衞卡特朗及大前鋒雷耶斯為首的「鬥牛兵」否認放水，兼交足戲扮無辜，然而法國於8強焗撼西班牙當然氣頂，消息指該國籃總已向法國奧委會及國際籃總投訴，要求徹查「巴西戰」第4節疑點，恨不得要取消「鬥牛兵」的參賽資格！

美國大勝搭火車扮平民

美國實力超班連西班牙都要「搵路走」，該支奪標大熱昨晨就憑杜蘭特貢獻全場最高的28分，以126:97大勝阿根廷，5戰全勝以A組首名躋身8強。賽後眾將一時興起，捨棄隊巴改搭火車返酒店扮平民，輕鬆迎接8強實力最削的澳洲。