哈利王子寧睇沙排「睇女」

本屆奧運於倫敦舉行，英國皇室成員當然空群出動，齊齊瞓身支持。威廉王子身為英足總名譽會長，將親身入場力撐英國隊，馬術項目亦是他杯茶；至於仍屬「單身貴族」的哈利王子，就坦言最想睇沙灘排球，高調表示要現場「睇女」！

撐老友保特爭百米飛人

倫敦主辦奧運，英國皇室貴族在公在私當然要現身「硬銷」。哈利王子尚未結婚，血氣方剛的他表示最想入場看沙排：「我知道皇家騎兵衞隊閱兵場已變為沙排場地，我一定要去看看，必定是一個極佳體驗，哈哈哈！」雖然講得隱晦，但哈利「睇女」之心可謂路人皆見。

望完靚女，哈利才有閒情維繫友情：「因為我和保特好老友，一定會欣賞百米飛人決賽，為他打氣。」今年3月哈利出訪牙買加時，就曾和保特進行「友誼賽」，當時保特「放水」讓哈利勝出，二人遂成好友。

至於其兄長威廉王子，將於本月29日現身溫布萊球場，欣賞英國男奧足對阿聯酋的比賽，其妻凱塞琳就會睇曲棍球及網球賽事。另邊廂，安妮公主女兒札拉，亦會代表英國參加馬術比賽，威廉王子為支持表姐，將號召皇室成員到場打氣！