6大廚去北京學師 地道中國菜慰健兒

民以食為先，國乒領隊黃颷踢爆運動員擔心英國「冇啖好食」，出征集訓前都帶備辣椒醬、榨菜、腐乳及公仔麵以備不時之需。看來他們似乎過慮了，因為利茲大學早在今年5月已派6位大廚到北京學師，中國代表團更特別派出1位來自國家體育總局訓練局的廚師駐守利茲大學試味，保證運動員身在利茲亦能歎盡家鄉風味。

據悉，6位「滿師」的大廚如今已精通中國佳餚烹調方法，每日均會悉心炮製多款地道菜式予運動員，包括宮保雞丁、豬肉腸、紅燒雞腿、蛋花豆腐湯、芹菜炒木耳、清蒸青花魚及葱花炒蛋等。

中國超市買調味料

據利茲大學奧運項目官員戴維斯透露，中國代表團的食材均由本地農場供應，保證新鮮， 調味料方面，就更加盡力從利茲的中國超市內購買，希望確保菜式味道夠正宗，認真體貼。

除了中國傳統菜式，利茲大學更提供了窩夫餅及多款英國特色甜品，食堂每日起碼有25款中西合璧的美食任君選擇，梗有一款啱運動員胃口！同時，校方又製作了一系列三文治，方便運動員攜帶出外，保證一眾衝金健兒「唔會餓親」。

廚房工作人員分3組開工

單計飲食系統已如此龐大，校方當然都有充足人手，淨計廚房入面的工作人員（不計廚師），每日就有15人開工，分成3組負責準備材料、烹調及洗碗，認真大陣仗！