「籃壇柏金」韋特患飛行恐懼症

環顧應屆新秀，安東尼戴維斯固然鶴立雞群，分列選秀16、21順位的韋特（Royce White）及蘇寧加（Jared Sullinger）亦同樣充滿話題性。當中韋特自18歲開始就患有飛行恐懼症，NBA球隊賽程頻密，搭內陸機都搭到癲，火箭選中這位「籃壇柏金」豈不是搵自己笨？

查實早在選秀大會前，韋特已向《體育畫報》自爆患飛行恐懼症，不過情況就沒有阿仙奴名將柏金那麼嚴重，韋特靠藥物協助下依然能搭飛機，只是起飛前會極度不安及緊張。之不過據焦慮症網站anxieties總監、醫學界權威列特威爾遜向《MSNBC》表示：「唔少患飛行恐懼症嘅病人都係諗嘢正面、勤力同活力充沛，佢哋集中力好強，會諗辦法去克服恐懼，我認為呢種病對韋特嘅NBA事業反而有幫助。」

蘇寧加隨時變「奧登二世」

至於本被視為前10順位的蘇寧加，選秀前被NBA醫生發現由於腿筋及股四頭肌太緊導致背部腫脹，隨時縮短其職業生涯，故列強均對這位大前鋒耍手擰頭，淪落到第21位才被塞爾特人選中。玻璃狀元奧登近年傷多過打，蘇寧加已被美媒普遍視為「奧登二世」，正所謂高風險高回報，火箭及「綠軍」博贏定博輸將成大眾焦點。