拿度溫網出局 狂牛失冠凶兆
意大利、西班牙合演歐國盃王者戰，拿度出局露凶兆！？喺分組賽獲西班牙「放生」嘅意大利，尋日4強大戰以2:1擊敗德國，將喺香港時間周一凌晨同鬥牛兵合演終極決戰，不過形勢已大為不同，大熱西班牙唔單只歷來7次大賽撼意大利未贏過，昨晨更驚聞「奪冠福星」拿度溫網次圈出局噩耗，後者慘吞7年嚟大滿貫最恥辱敗仗，隨時成為「狂牛失冠凶兆」！
今屆分組賽最後一輪，西班牙只要同克羅地亞踢成2:2或更大比數和局，就可以煮死「剋星」意大利，不過當時西班牙並冇咁做，結果「放生」變成「放虎歸山」。意大利出線後愈戰愈勇，尋日憑巴洛迪利連入兩粒擊敗德國，意大利總統納波利塔諾即時送上祝賀：「已經諗唔到用咩形容詞嚟讚美，意大利國家隊實在太偉大！」
西班牙唔後悔放生剋星
賽後足智彩雖然將西班牙列為1.52倍熱門（意大利2.35倍），但佢哋對意大利嘅主W，就由尋日晏晝初盤1.83倍不斷降溫，到尋晚上到去1.92倍，而且意大利進身決賽似乎更符合天意：自94世盃攞亞軍開始起，每隔6年就入大賽決賽（00年歐國盃亞軍、06年世界盃冠軍）。如今決賽再鬥分組賽「恩人」西班牙，領隊柏蘭迪利就扮嘢話：「西班牙雄霸球壇多年，點計都係大熱！」
不過事實係，西班牙歷來喺世盃、歐國盃決賽周7鬥意大利，法定時間係未贏過波。雖然決賽再遇剋星被指放虎歸山，但領隊迪保斯基話唔後悔：「我哋唔會後悔冇整死意大利，只係做自己應該做嘅事，西班牙每仗都全力以赴。」
次圈不敵捷克「二打六」
「狂牛」唔止輸往績，最慘連「奪冠福星」都冇埋！皆因拿度喺08年同10年贏得溫布頓冠軍後，西班牙就捧走該年嘅歐國盃同世盃！可惜呢位兩屆盟主，昨晨苦戰逾3小時後竟以7:6（11:9）、4:6、4:6、6:2、4:6不敵世界排名100位嘅捷克「二打六」羅素，繼05年後事隔7年再喺次圈拜拜，爆出本屆最大冷門，亦恐成「狂牛凶兆」！
近態低迷嘅拿度賽後勁失望：「我好唔開心！好彩只係第2輪，如果喺4強或決賽先輸波會更痛苦。呢個就係體育運動，冇長勝軍！其實我近半年打得太多比賽，身體要休息一下，雖然輸波會令人信心下降，但唔會影響我之後比賽（倫敦奧運）嘅動力。」拿度爭冠夢碎，惟有寄望一眾西班牙國腳老友唔好畀自己「剋死」，蟬聯歐國盃幫佢止痛吧！
拿度食咗羅素22個A士波，打到冇晒計。（Getty Images圖片）
拿度罕有地打到咁狼狽，唔輸就奇。（美聯社圖片）