舒娃撐男女同酬插西蒙

剛入選ATP球員理事會嘅法國球手西蒙，日前對大滿貫男女球手同工同酬表示不滿，但呢番涉有「性別歧視」嘅言論即遭兩大「女王」舒拉寶娃及S威廉絲圍插，昨晚以6:1、6:4拍走謝淑薇進身16強嘅「舒娃」寸爆反擊：「睇我比賽嘅人肯定多過佢！」

舒娃 祖高域入16強

「男女平等」再次成為網壇熱話，西蒙認為大滿貫獎金分配有問題，男女同酬對男子球手極唔公平，梅萊都聲援話：「女子比賽唔使打5盤3勝，單、雙打雙線作戰非難事，佢哋自然有更多賺錢機會。」對於受到「歧視」，舒拉寶娃強勢回應：「我哋為同工同酬奮鬥多年，我為此感到驕傲，就算冇人真正支持我哋，唔理外界有乜嘢批評，可以肯定嘅係，入場睇我比賽嘅人比西蒙多！」

「細威」亦力挺「舒娃」話：「無錯喎，睇瑪利亞（舒拉寶娃）球迷一定多啲！其實女網比賽都好精彩，打巡迴賽每個人都好努力付出。」西蒙場外「被插」，場內亦冇運行，昨以4:6、4:6、6:7（5:7）不敵比利時馬利斯，次圈止步。

另邊廂「英國希望」梅萊以7:5、6:7（5:7）、6:2、7:6（7:5）淘汰克羅地亞大炮卡路域，殺入32強，不過卡路域賽後稱聲遭受「黑哨」:「我被判了11次『腳誤』，我覺得受騙，裁判作弊！」衞冕「一哥」祖高域昨晚亦喺先失一盤下，以3:1反勝捷克史彭力，躋身16強。（now671台周六晚6:30直播）