雷霆孖寶中美人計？

雷霆蒲精中正「大帝」美人計？總決賽生死戰前夕，韋斯布克被踢爆於邁阿密夜店「以一敵三」，美媒《Terezowens》更大爆夏登夜蒲期間搭上勒邦占士的女性友人，難怪有傳媒揣測占士乃雷霆孖寶蒲到跌Watt的幕後黑手！

韋斯布克蒲到腳軟

夏登上周六殺落南灘夜店Prime 112狂歡，期間與兩位索女打得火熱，其中一人被起底證實是「大帝」的密友（上左圖左），從而引發占士施美人計陷阱跣夏登一鑊的陰謀論。昨日正值Game5生死戰，韋斯布克前一晚繼續夜蒲，一張與3位辣妹排排坐的合照出街後被球迷炮轟，這名控衞昨日20投僅得4中，擺明P:蒲到「腳仔軟」。

隊友「唔生性」，杜蘭特轟入全場最高的32分亦無補於事，KD完場後強忍淚水向好兄弟勒邦占士祝賀，轉頭返入球員通道即告崩潰，攬住胞兄及媽媽喪喊。及後杜蘭特出席記者會時表示：「咁樣功敗垂成真係令人好心痛！我唔會離隊，亦唔想同其他球星組巨頭聯盟，今個夏天成隊雷霆都會加倍訓練，捲土重來。」