俄克拉荷馬城冚老翻商品

雷霆首次殺入Finals令全城陷入瘋狂，帶動球會周邊商品銷量勁升，就連山寨商品亦充斥俄城街頭巷尾，迫使美國政府執法部門要「掃貨」。雷霆效應爆發，如今已超越欖球及摔角，榮升俄城人民至愛體育項目！

據雷霆官方售賣店職員透露，自從雷霆捧走西岸冠軍後，商店已收到全美各地定單，營業時間不斷延長之餘，更創下球隊由西雅圖搬竇到俄克拉荷馬城的最高營業額。美國政府透露，每年分岸決賽及總決賽期間，乃山寨NBA商品氾濫市場的高峰期，當地執法部門近日已展開「掃貨行動」，從4間商店檢獲超過300件老翻雷霆Tee，有店舖老闆就大吐苦水：「我哋只係想支持雷霆，唔係想侵犯商標。」

全「城」最受歡迎運動

隨着雷霆愈戰愈勇，當地有紋身店老闆賣大包免費幫顧客紋雷霆圖案，傳媒紛紛表示俄城已變身成為一個籃球城市，有市民向《News9》電視台表示：「雷霆以前係魚腩，送飛都唔會坐爆，家陣一票難求，唔少人都已經將嚟緊嘅欖球決賽同摔角賽事拋諸腦後，迎接俄城嘅第一個NBA總冠軍！」