韋斯布克一人演兩角 為亡友圓冠軍夢

“我當正巴斯同我一齊打波，如果雷霆攞到總冠軍，巴斯都有功勞！”

雷霆首奪西岸冠軍，陣中三寶杜蘭特、占士夏登及韋斯布克可謂居功至偉，偏偏韋斯布克（RW）就最欠星味，除了經常被嘲樣衰貌似忍者龜外、獨食打法亦惹來口誅筆伐。RW為爭勝懶理種種批評，事關這位悲情4年生正背負着沉重承諾，場上要分飾兩角，場外就做兩份家務，一個人抱着兩個夢想，目標直指總冠軍為逝去挈友圓夢！

8年前就讀Leuzinger高中的韋斯布克，礙於當時的身體條件及技術麻麻，只獲得兩、三間大學籃球隊關注，反而其由細玩到大的老死巴斯（Khelcey Barrs）則是學界風頭躉，高中二年級時已獲包括UCLA等全美大學教練垂青，前途一片光明。分道揚鑣看似是兩位好朋友的故事發展，豈料這一次分離卻令二人成為永訣。

為好友入UCLA

當年16歲的巴斯患有心臟發大症，出戰洛杉磯西南大學的組隊賽時突然休克，送院後不治，對於時年15歲的韋斯布克來說無疑是沉重打擊。自此RW便花了兩倍時間和精力練波，搖身一變成為全美一線控衞，並獲多間大學招攬，最終選擇了UCLA，彷彿還了巴斯的心願。

戴KB3手帶悼亡友

韋斯布克表示：「我覺得巴斯只係突然跌親，然後唔知去咗邊，我會去屋企對面幫巴斯個婆婆倒垃圾，因為佢以前每日都係咁做。」韋斯布克每次出場前，都會戴兩條橡膠手帶，一條寫住「KB3（巴斯英文簡稱）」，一條寫住「Why Not？」，用作提醒自己要付出兩倍努力，代表住兩個人打波。

RW稱：「我從來唔拒絕任何可能性，唔試過點知會唔會成功呢？我當正巴斯同我一齊打波，如果雷霆攞到總冠軍，巴斯都有功勞！」若果雷霆完成任務，相信巴斯在天之靈定必會為RW感到驕傲。

韋斯布克

出生日期：1988年11月12日出生地：美國加州長灘

身高/體重：6呎3吋/187磅

NBA選秀年份：2008年首輪第4位被超音速揀中

現効力球隊：雷霆