槍王杜蘭特拔「刺」雷霆追平

嚴媽出槍王!自爆每日操練未能投進2,000球便冇飯開的杜蘭特,在鐵腕阿媽督操下習成槍王殺着,昨日於末節瘋狂掃射連入16分,加上隊友伊巴卡百發百中破盡聯盟紀錄,協助雷霆主場以109:103力克馬刺追成2:2平手,明早易地再戰內線將成爭勝關鍵!(now635台及廣東體育周二早上9:00直播)

杜蘭特早前透露,每日操練為自己定下投入1,300球的目標,但如果母親在場督操則至少要射入2,000球,否則就會冇飯開。KD昨在母親到場打氣下,戰至末節剩餘6分33秒連續取得16分,並攻入全場最高的36分成為雷霆贏波功臣。

伊巴卡11投全中

至於大前鋒伊巴卡同樣叻仔,昨仗11射11中兼且4罰全中貢獻26分,成為聯盟近27年來首位於季後賽11射全中球員。賽後馬刺主帥普波維治輸得心服口服:「我已經試過用唔同方法,但始終嘜唔住杜蘭特!伊巴卡仲癲,練波冇人嘜都好難11射中晒啦!」

馬刺面對年輕力壯的雷霆開始冇符,以鄧肯及戴奧為首的內線亦已經被雷霆雙塔伊巴卡及柏堅斯攻陷,明早主場出擊都信唔過,雷霆受讓4.5分要下盤。東岸決賽方面,塞爾特人繼校凍冷氣及向球證施壓之後繼續玩「火」,昨日被指於TD花園主場做手腳整爛地板,似乎企圖於今早進行的Game4再跣熱火一鑊。