KD食正廣告靚橋絕殺湖人

【美聯社圖片】繼Game2絕殺得手後，得分王杜蘭特再發揮關鍵先生本色，這位Sprint電訊網絡供應商代言人食正新廣告條絕殺靚橋，昨藉一記攞命3分波以103:100反勝湖人，明早再贏即可率雷霆殺入西岸決賽！

雷霆再贏即闖西岸決賽

杜蘭特最近為Sprint任代言人，於新廣告呼籲客戶使用該公司的無限數據上網服務，這便不會因「爆Data」而欣賞不到其絕殺好戲。果然，杜蘭特昨日又再重施故技，全場攻入31分帶領末節落後9分的雷霆後來居上，並於完場前13.7秒命中絕殺3分波，助雷霆以3分之差贏波，將領先優勢擴大至3:1。

反觀湖人王牌高比拜仁雖貢獻全場最高的38分，奈何第4節10射僅2中累球隊輸波，今季於關鍵時刻愈來愈「靠唔住」，比賽終結者美譽已拱手讓予後輩杜蘭特（見表）。賽後「小飛俠」罕有批評隊友，炮轟加素「冇吉士」起手兼交失波孭鑊，中鋒拜林亦埋怨末節持球機會太少，陣營怨聲載道，雷霆有望乘勝追擊，明早回師主場讓5.5分一於撐上盤。

杜蘭特（中）再做關鍵先生，表現冇得彈。