古班搵D-Will重建王朝

小牛揸乾揸淨捧蛋出局！被視為今季NBA「老殘」的小牛，昨日又在關鍵時刻腳軟，重蹈第1、2戰的覆轍反勝為敗，主場以97:103不敵雷霆，成為NBA史上第3支於首輪季後賽被橫掃出局的衞冕冠軍。被炮轟因胡亂交易累死小牛的老闆古班唔認衰，谷住谷住勢必藉巨大薪酬空間重建小牛王朝！

賽前落後0:3的小牛昨日有頭威冇尾陣，原先帶着13分的優勢進入第4節，奈何以傑特、泰利及魯域斯基3位「老牛」為首的鐵三角明顯打到莫氣，最後5分47秒竟8射全炒，卒之被雷霆第6人占士夏登於末節攻入15分及交出3次助攻打殘。即使「迷信男」泰利賽前將全屋掃把敲爛，亦未能助小牛逃過以6分之差落敗，遭橫掃0:4出局的厄運。至於雷霆則起碼有1個星期休息時間，備戰下輪賽事。

第4節例牌死火

小牛於整個系列賽的第4節例牌跌Watt，第1、2及今戰都重蹈「Lead住」入第4節但反敗的覆轍，頭兩戰於末節命中率分別得41.1%及35%，今戰更只有26.3%，面對年輕力壯的西岸新貴雷霆明顯輸體能。賽後「德國槍」難掩失望之情，指雷霆有杜蘭特、韋斯布克及占士夏登輪流孭飛，暗示隊友「幫唔到手」之餘，更再一次借奧當出氣：「奧當加盟完全冇作用，如果佢打得番最佳第6人嘅表現，小牛就唔使咁慘！」

德國槍怨買錯奧當

老闆古班季前將冠軍陣容拆散，送走控衞巴利亞及應屆最佳防守球員贊特拿，失敗交易如今備受炮轟，不過古班依然死雞撐飯蓋唔認衰，揚言會捲土重來。經歷今季後，小牛來季的保障合同金額為4,140.6萬美元（約3.2億港元），意味會方仍有1,700萬美元（約1.3億港元）薪酬空間，消息指古班已視籃網控衞迪倫威廉士為傑特接班人，由羅致D-Will展開重建計劃第一步。

另一支西岸老牌勁旅馬刺，昨日就以102:90輕取爵士，明早作客讓5.5分大家不妨捧上盤，撐馬刺橫掃爵士晉級。