亨特利封Cue去中國搵銀

「桌球皇帝」宣布封Cue！昨晨在世界桌球錦標賽8強以2:13不敵麥佳亞的亨特利，賽後宣布一個震驚的消息，現年43歲的他決定退役。這位被譽為史上最出色桌球手的蘇格蘭巨星解釋結束27年職業生涯，全因再難打出心目中的水平，未來日子他寧將精神放在中國發展事業。

在慘敗後宣布這個沉痛決定，「亨哥」解釋封Cue與輸波無關，早在3個月前他已落實在世界賽後退役：「呢個係好容易嘅決定，其實過去10年我一直打唔到自己想打嘅桌球，成績令我失望又失望，我經常喺賽事首兩圈輸畀一啲我明知佢水準唔及我嘅球手，隔咗一排，我真係覺得受夠喇！」

無悔告別「好過輸0:13」

曾經7奪世界冠軍的他認為，以這形式告別職業賽，以及告別桌壇聖殿克魯斯堡哥劇院已屬無悔：「唔能夠再喺度比賽令我好傷心，喺最後一戰輸2:13雖然唔好睇，但總好過輸0:13啦！我喺呢度有太多回憶，我第一次喺度打波，第一次喺度封王，我喺度贏咗7次冠軍，我嘅經歷用嚟寫書都得！」

其實在今屆賽事，亨特利於首圈便打出在正式比賽的第11次「147」，次圈則淘汰衞冕冠軍希堅斯，最終雖8強止步，但成績已絕對有交代。

「中式八球」代言人

展望未來，他並未打算徹底與桌球壇分開，只是將戰場移往中國：「我喺中國有好多發展承諾，如果要兼顧比賽，我會冇晒時間陪屋企人。」事實上，「亨哥」早已是一種類似美式8號球的「中式八球」運動代言人，並在中國簽下不少合約，未來日子說不定他會在中國打更多表演賽，這對中國球迷來說，皇帝「封Cue」也未嘗不是一件好事。

皇帝小資料

出生日期：1969年1月13日（43歲）

國籍：蘇格蘭

最佳世界排名：第1（9年）

職業生涯獎金：8,637,360鎊（約1.09億港元）

一Cue最高度數：147（11次）

一Cue過百度數：775次

威水史：共74項冠軍

MBE（英國皇家勳章）：1994

BBC蘇格蘭年度體壇風雲人物：1987、1996

世界桌總年度最佳球員：1990、1991、1992、1993、1995、1996

世界桌總最佳年輕球員：1988

世界桌總年度最佳表現：1995