羅斯收咧無緣倫奧

NBA季後賽昨晨甫揭戰幔即傷亡慘重,聯盟「一哥」公牛贏波輸人,陣中球星戴歷羅斯因前十字韌帶撕裂宣布收咧,大大削弱公牛爭標本錢;至於紐約人新秀森柏特亦受重創,盛傳會方焗住要逼林書豪提早復出救亡!

公牛昨晨於季後賽揭幕戰以103:91擊退76人先拔頭籌,去屆MVP羅斯全場貢獻「23+9+9」的準三雙數據,狀態明顯復甦,奈何完場前卻因1次剷籃落地後「企唔穩」中招,隨即痛苦倒地並需由軍醫攙扶離場。經過賽後的磁力共振檢查證實,羅斯前十字韌帶撕裂面臨6至9個月休養期,鐵定提早收咧兼無緣倫敦奧運。

領先12分照落場教練孭鑊

悲情「牛魔王」今季先後觸傷腳、足踝、腹股溝、背部及腳趾,連同今次韌帶受創今季總共出現6處不同傷患,慘成聯盟「玻璃王」,今次再度「賴嘢」泰保杜難辭其疚,事關公牛昨仗於完場前1分09秒已領先76人12分,該名公牛主帥仍堅持派羅斯落場的決定備受質疑。

森柏特扭傷左膝抖半年

另一場矚目Game 1大戰,人氣隊伍紐約人作客以67:100大敗給熱火,除了平下創會史上單場季後賽最低得分外,季後賽連輸場數已延續至11場。雪上加霜是新秀森柏特於第3節扭傷左膝,賽後證實交叉韌帶撕裂需進行手術,至少休戰半年。

據悉,紐約人控衞林書豪於比賽前3小時進行了全方位投籃甚至與助教艾堅遜進行「One On One」,康復進展理想,雖然會方未有透露「林瘋」的復出日期,不過《CBS》就爆料,指紐約人有意逼J.Lin於本輪系列賽甚至Game3復出救亡。

林書豪或Game 3復出救市

林書豪若能神奇復出對紐約人無疑是及時雨,相信就連熱火亦相當歡迎,皆因昨仗美航球場的平均票價是226.13美元,僅為雙方於常規賽交手、即「林瘋」爆發時期的一半價格,證明J.Lin缺陣亦屬熱火損失。雙方明早於Game 2再度交鋒,失誤次數位列聯盟第2的紐約人隨時又被熱火「撳住砌」,熱火主場讓9.5分照捧上盤。

波鞋設計師寸牛王着錯鞋

為勒邦占士設計波鞋的NIKE高級設計師Petrie幸災樂禍,昨晨透過twitter表示:「一個(占士)就愈打愈有,一個就打柴,你揀錯鞋嘞Pooh(羅斯的花名),你應該投靠NIKE懷抱。」留言一出,Petrie即惹來大批「牛迷」炮轟,美媒更指該位NIKE員工即將飯碗不保。

戴歷羅斯啱啱傷愈,估唔到打一場季後賽就收工。(美聯社圖片)

贏緊12分仲繼續搏,羅斯(下)贏體育精神卻換來提早收咧。(美聯社圖片)