NBA球星奇招提神迎季後賽

睡眠是人類必需品,可憐今季NBA受停擺影響導致賽季濃縮,令不少球員「冇覺好瞓」。為了應付趕命賽季,一眾NBA球星各出奇謀,當中「洛城雙雄」高比拜仁及科爾就度到好橋幫助入睡,以勒邦占士為首的「瞓唔着派」就「隊嘢」提神,奇招盡出抗眼瞓迎接季後賽!

快艇1個月打20場最淒涼

今季NBA賽程趕頭趕命,列強要於124日內打66場常規賽,當中西岸新貴快艇就慘成最大受害者,基於賽程編排,3月份要出戰20場比賽,屬NBA近45年來至陰功賽程。每逢作客就更加慘情,大軍通常在當地時間凌晨2時才到達客隊城市,但翌日早上9點就要出席投籃練習,加上「背靠背」賽程當道,金塊控衞安祖米拿、湖人「壞孩子」阿堤斯及快艇「入樽王」格芬都向《洛杉磯時報》同聲抱怨「太攰導致失眠」。

高比租靚酒店瞓晏覺

據美國疾病控制與預防中心表示,超過3分1美國成年人每晚睡眠不足7小時,NBA球員亦屬於這一群。有見及此,有5枚冠軍指環的湖人王牌高比拜仁就公開成功秘訣!為了令自己有更佳狀態迎接季後賽,「小飛俠」不惜出動銀彈政策,常規賽期間每逢賽前例必租住靚酒店瞓晏覺,實行用錢購買高質素睡眠,難怪33歲都可以Keep住高水準演出。雖然韋斯布克及戴歷羅斯都有賽前午睡習慣,卻只是屈就在更衣室,豪爽程度輸「小飛俠」幾條街。

至於快艇射手科爾亦相當有計,每晚都會放棄熱爆美劇及音樂節目,轉投軍事頻道的懷抱!科爾表示:「軍事台嘅節目有時播黑白片,仲要鬼死咁悶,睇完唔瞓嗰個我話佢叻!」

米克布朗要打地鋪

瞓得着固然幸福,瞓唔着的一班球星亦有奇招,勒邦占士早前被目擊於新澤西歎甘菊茶醒腦,湖人的班尼斯及雷霆的柏堅斯則於賽前「喪隊」帶有興奮作用的飲料提神。除了球員,教練亦是趕命賽季的受害者,金塊教練卡爾就指教練團比球員更疲累,事關他們比球員的休假少得多,湖人主帥米克布朗為慳時間瞓覺,今季更多次於辦公室打地鋪!今個賽季真是苦了班球員同教練喇。