新成員「芝治」勁旺傑志 三個「老竇」照顧「吉祥犬」

傑志在月中的聯賽盃決賽，縱面對球員傷停及征戰頻密的不利因素，仍以2:1力克天水圍飛馬捧盃。賽後傑志教練甘巴爾，將捧盃功勞全歸於球員及擁躉，但據來自傑志球員宿舍未經證實的消息，球會「吉祥犬」「芝治」散發的旺氣，才是球隊捧盃關鍵！

或許傑志球迷，甚至大部分傑志職球員尚未知道「芝治」的存在，其實「芝治」乃一隻約3個月大的金毛尋回犬，傑志在15號（星期日）出戰聯賽盃決賽，身為「芝治」監護人的林嘉緯、朱兆基和曾錦濤於12號（星期四），才從前甲組球員朱偉霖跟太太經營的寵物店接走該隻狗女，故有幸與「芝治」碰過面的人並不多。現在就由「芝治」的三位「爸爸」，為大家介紹一下這位傑志大家庭的新成員。

基：朱兆基 緯：林嘉緯 濤：曾錦濤 頭：記者

頭：點解會有喺宿舍養狗嘅念頭？

基：冇呀！咁啱同佢哋（指林、曾兩人）傾開不如喺宿舍養隻狗仔，等宿舍可以多啲生氣同歡樂，又咁啱「阿霖」（指朱偉霖）話佢舖頭有個客隻金毛生咗兩隻BB，問我哋有冇興趣要，就係咁啦！絕對係啱啱遇着剛剛。

「甘仔」？「芝治」？改名有段古

頭：你哋有冇養寵物經驗？識唔識養o架？唔會熱情過後就話唔養畀番人哋啩？

濤：梗係唔會！我哋好負責任，我同「兆基」本身屋企都有養狗，細細個已經同寵物接觸，可以話係經驗豐富；雖然「嘉緯」未養過寵物，但識佢嘅人都知佢份人好細心、好溫柔，「芝治」亦都好跟佢，所以一定唔會有問題。

頭：講時講，我最初聽到「芝治」個名仲以為係英文名Gigi，個名點嚟o架？咩意思？

基：咩意思就唔好講喇（三人齊齊奸笑），費事有人唔開心啦！

緯：我哋試過用唔同嘅名嗌佢，好似「甘仔」（三人再齊齊奸笑）咁，佢都冇咩反應，但一嗌「芝治」，佢就好興奮咁走埋嚟同我哋玩，佢好似好鍾意呢個名。

返屋企幾日識跳上床

頭：「芝治」返咗宿舍都個幾星期喇，期間有冇咩趣事？

濤：佢好嗲又好乖，氹得我哋好開心，好似有日佢照住塊鏡見到自己，以為有第二隻狗喺度，之後圍住塊鏡跑嚟跑去「搵自己」，笑死我哋。

基：「芝治」好有性o架，佢會知道做錯嘢整嬲咗我哋，我哋大聲啲講嘢咋，佢就會跑埋嚟黐身黐勢嗲我哋，我哋仲點識嬲呀？

緯：佢啱啱嚟已經成日想跳上我張床度，但跳唔到，點知早幾日我喺床尾睇緊嘢，一擰轉頭就見到佢瞓咗喺我後邊，嚇咗我一跳。幾日咋，就跳到上嚟，真係快高長大。

頭：聽講金毛大得好快，而且可以比依家大幾倍，日常照顧都幾講工夫，有信心搞得掂？

緯：「阿基」應該OK，但我同「阿濤」暫時都唔敢同「芝治」沖涼，我抱佢都未係好敢，所以有咩需要都會帶佢去「阿霖」舖頭，交畀阿嫂搞掂，呢啲錢唔慳得。

今赴星洲備戰亞協盃

頭：大家覺得宿舍多咗「芝治」嘅感覺點？

基：大家多咗好多共同話題，開口埋口都係「芝治」。

濤：除咗同佢玩得好開心之外，最緊要係佢好旺我哋，佢嚟咗三、四日，我哋就贏咗聯賽盃喇。

緯：我都有「阿濤」嘅諗法，不過如果我哋贏埋個聯賽就堅旺我哋喇！哈！哈！（上周四林嘉緯榮膺三月份港甲MVP後，他就在社交網站上留言多謝「芝治」。）

傑志大軍今天便會起程飛赴新加坡戰亞協盃分組賽，「爸爸」們將要與「芝治」暫別數天，不知他們會為「芝治」送上甚麼星洲特產呢？

鳴謝：Flower Pet Grooming