出變種「紅軍波鞋」 大帝被轟假利迷
「假利迷」勒邦占士抽水露底！上年宣布入股「愛隊」利物浦嘅NBA巨星勒邦占士，最近借利物浦過橋推出「紅軍波鞋」掠水。不過波鞋一出即時引嚟猛烈批評，事關鞋上嘅「利物鳥」完全變樣、仲離譜到印上18個紅軍從未攞過嘅英超冠軍圖案！
當勒邦占士去年自爆係「紅軍」死忠後，利物浦上下當堂臉上貼金，仲玩埋入股實現「英超 X NBA」Crossover。「大帝」最近食住條水，用自家波鞋品牌推出「LeBron 9 Low」利物浦版，除咗球會標誌受版權所限唔落得外，隻鞋每個部位都充滿利物浦元素。
「紅軍波鞋」初步定喺5月5日發售，即係利物浦對車路士場足總盃決賽嘅大日子，美國權威媒體NESN發布消息後大讚特讚：「波鞋迷同紅軍迷非常興奮，勒邦占士對新鞋可以將利物浦帶去世界每條街道上！」好可惜，實情係利物浦球迷對「大帝」對新鞋極度不滿！
足總盃決賽日開售
首先對鞋背部隻「利物鳥」走晒樣，似惡魔仲多過似雀仔，最大鑊係鞋底懶醒印上18個冠軍圖案，象徵利物浦贏過18次聯賽冠軍，衰就衰在個圖案用咗英超Logo，而「紅軍」喺英超成立後係一次都未贏過，咁樣反而再刺痛利迷嘅傷疤，搞到大批擁躉喺網上怒插勒邦占士。
一名叫希基嘅球迷怒轟：「請即刻刪走所有圖案！如果你要用利物鳥，唔該確保個設計係100%正確！」另一位Jason就話：「真係笑話！勒邦占士應該知道利物浦未贏過英超啩？」唔少球迷指勒邦占士對利物浦嘅歷史同文化一無所知，點解仲有面自稱係紅軍Fans？
（設計對白及圖片）