山貓將帥更衣室開拖

東岸魚腩山貓今季輸到懵，淪為聯盟笑柄，球隊戰績本來已經衰到貼地，大軍昨日更爆出將帥開拖羞家醜聞，兩位主角包括教練施拉斯及特魯斯湯馬士竟於更衣室開片，卒之被會方作內部處分。陣營爆內訌，並大有機會成為NBA史上戰績最屎球隊，山貓今勻可謂屋漏偏逢連夜雨！

施拉斯 湯馬士齊被罰款

山貓本周一不敵有三巨頭休戰的塞爾特人，教練施拉斯心情已經差，眼看陣中前鋒特魯斯湯馬士竟於比賽期間與「綠軍」球員有講有笑，施拉斯當然無名火起。據專爆猛料的《Yahoo！》記者Adrian透露，山貓賽後返回更衣室時，施拉斯即時向湯馬士開火，後者駁嘴後被施拉斯呼喝：「你一係收聲，一係就聽坐冷板！」

消息指湯馬士嬲到彈起，68歲的施拉斯先發制人，一手將湯馬士推撞到儲物櫃並扭作一團，若非一班隊友介入將兩人分開，一場「自由搏擊」肯定一發不可收拾。山貓總經理希堅斯向傳媒證實事件，表示已向施拉斯及湯馬士作出罰款，後者昨日雖「交足戲」稱與施拉斯關係無問題，但有隊友爆料指兩人自開拖事件後已恍如陌路人。

輸多5場即破76人最差紀錄

山貓昨日主場以68:100大敗給公牛後已連輸18場，今季常規賽僅錄7勝54負劣績，若餘下5場賽事全告敗陣，將會以10.6%勝率衝線，打破76人於72至73球季所創下的11%至低勝率，成為NBA史上戰績最屎球隊。旗下隊伍衰到貼地，老闆米高佐敦顏面何存？難怪「波神」近日已積極兜售球會，奈何根本沒有買家肯接手這個爛攤子！