麥露蓮扑中51倍冷門

日前朗尼兩公婆同幾位曼聯球星夫妻，跟費格遜入安樹馬場搏殺，其中麥露蓮仲敲中51倍冷門贏大錢，人索眼光準，點到你唔服？

曼聯周中輸畀韋根，不過無損費Sir心情，前日佢就搵埋幾個紅魔隊員包括朗尼、莊尼伊雲斯同費查等，齊齊帶埋女伴入場，為費Sir愛駒「What A Friend」打氣。麥露蓮喺該場大賽唔撐費Sir不特止，仲走去拗頸博冷，買中隻大冷門，賽後麥露蓮仲即時上Twitter「寸寸貢」認叻！

史摩寧打Golf行善

身穿性感粉紅色迷你裙嘅麥露蓮，憑住獨到眼光加索爆外形，成為馬場焦點，著名博彩公司Ladbrokes嘅代表謝茜加布列治話：「麥露蓮嘅出現，將會為我哋吸引大批女性加入投注行列。」謝茜加布列治預計，呢股「麥露蓮效應」可以谷大今次為期3日嘅賽馬嘉年華會投注額，去到1億鎊。

咁又唔係個個紅魔都掛住賭錢嘅，另邊廂曼聯件新星基斯史摩寧、菲爾鍾斯就聯同史篤城前鋒高治，去咗個高爾夫球慈善賽，當中史摩寧仲打得似模似樣，第時唔踢波都可以考慮下轉行打Golf喎！