大衞韋斯「泰臣上身」 打到騎士吉祥物入院

NBA「瘋」起雲湧！東岸新貴溜馬前日就爆出失控醜聞，陣中球星大衞韋斯賽前大發神經，竟使出連環拳打到騎士吉祥物入廠，不單嚇到隊友「O嘴」，更辣慶一班騎士Fans，有激進球迷更呼籲吉祥物「還拖」報仇，NBA自此又多一對仇家！

有晒證據繼續扮無辜

事緣溜馬前日造訪騎士，賽前進行投籃練習期間，大衞韋斯竟突然失控向騎士吉祥物Moondog（月亮狗）施毒手，左、右勾拳連環狂毆狗頭，打到吉祥物應聲倒地，連大衞韋斯的隊友希拔亦看到目瞪口呆。據現場目擊者透露，該位工作人員被毆後瑟縮一角，脫下頭套並用毛巾敷着眼睛，及後被球會職員送往醫院接受治療。

賽後溜馬中鋒希拔得知Moondog被打到入院顯得難以置信：「真定假呀？好黐線呀，我打咗咁耐NBA都未聽過有咁嘅事。」雖然NBA.com拍到的片段距離較遠，但亦可見到大衞韋斯拳拳有力，極度兇殘，不過這位「兇手」事後卻扮無辜，向《霍士體育》表示：「當時我係同佢（Moondog）玩吓，真係冇心打傷佢，喺度表示深切歉意，希望Moondog盡快康復。」

Moondog搞爛Gag：周一復出

事件於克里夫蘭惹來極大回響，大批球迷紛紛在Moondog的Twitter留言慰問，有激進粉絲更煽動吉祥物還擊，同「泰臣上身」的大衞韋斯開拖。

扮演Moondog的工作人員昨日已出院，昨晚透過騎士官網發表公開信報平安，更搞爛Gag稱：「多謝大家關心，我畀會方列入每日觀察名單，但相信會喺周一對魔術場波復出，到時見啦！」慘被打傷仍要繼續扮得意，搵食認真艱難！

NBA癲佬事件簿

1. 拜林 湖人中鋒 癲佬指數：★★★★★

日期：12/04/12 戰果：馬刺84:98湖人

點癲法：取得16分及30個籃板的拜林殺得性起，比賽尾段個個等吹長雞時，仍期望入多粒，竟連隊友布力克個波都想偷。

2.巴特治 巫師大前鋒 癲佬指數：★★★★

日期：10/04/05 戰果：巫師109:99籃網

點癲法：戰至第4節剩餘32.1秒，巴特治爭1個籃板便可取得「大三元」，奈何隊友卡迪亞馬田不知情與他爭奪籃板壞了好事，巴特治嬲到紮紮跳成為，惹笑片段至今仍於網絡瘋傳。

3.麥基 金塊中鋒 癲佬指數：★★★

日期：12/01/11 戰果：巫師93:78速龍

點癲法：當時仍効力巫師的麥基成場波夢遊球場，第3節一次攻勢誤以為對方搶到防守籃板，竟一支箭殺回後場，令仍在前場組織攻勢的隊友約翰禾爾「呆晒」。