林瘋大量約歧視編輯食飯
林書豪雖然正在養傷，但仍是紐約市的「瘋」頭躉，這位美籍華裔球星前日出席問答大會惹來一股撲飛潮，加上被踢爆不計前嫌，相約曾以歧視字眼侮辱他的編輯撐枱腳，胸襟廣闊人氣又勁，真係抵平民球星J.Lin爆紅！
前《ESPN》編輯費特列克上個月以「Chink（中國佬）」字眼為題形容林書豪，結果惹來軒然大波，卒之被《ESPN》以「涉嫌歧視」為由開除。無故受辱，J.Lin毫不介意，更在1個月前透過電郵相約該位被炒編輯見面，並於前日到曼哈頓一間餐館共進午餐。
據費特列克透露，他與林書豪會面超過1小時，不過兩人只花了3分鐘談論歧視問題，其餘時間主要討論J.Lin的膝傷及基督教問題，費特列克說：「實在太不可思議，能夠同林書豪撐枱腳真係好興奮，我好感激佢肯原諒我，佢份人冇架子之餘又謙虛，簡直係NBA球員嘅典範！」
同奧巴馬打One On One
人紅自然忙，雖受膝傷困擾連續缺席兩場常規賽，但J.Lin依然忙到甩轆，前日就獲體育市場代表公司Steiner Sports邀請出席問答Show，主辦單位食住「林瘋」條水將入場門票定價為200美元（約1,552港元），但依然供不應求，全場爆滿。J.Lin於是次問答Show大爆兒時鮮為人知的趣事，相信Fans捱貴飛亦肯定覺得值回票價。
另外，由於美國總統奧巴馬一向留意林書豪，美國教育部長鄧肯昨表示希望在年底大選前，安排林書豪與奧巴馬進行一場「One On One」對決，足證J.Lin魅力沒法擋。
紐約人方面，即使缺少林書豪及史杜迪米亞兩位十字軍，昨日依然憑安東尼獨取25分，主場以108:86大勝魔術。有指紐約人名宿伊榮吼實舊會帥位，暫代教練活臣當然繼續施展渾身解數博長約，明早揮軍造訪鷹隊有望4連勝，受讓4.5分敲下盤。（廣東體育周六早上7:30直播）
問答Show節錄
Q：棒球同籃球係紐約兩大熱門運動，你有冇玩過棒球？
A：冇，除咗籃球之外，我最鍾意打網球同游水。
Q：成長過程有冇啲咩趣事？
A：細個成日同哥哥打架，通常我都係捱打嗰個，之後我就開始玩單槓練大隻，希望有朝一日可以報仇。
Q：仲做過啲咩練大隻？
A：游水，不過我試過喺5歲嗰年遇溺，好彩及時獲救先執番條命！
