主動同軍人合照 熱火輸波占士照攞彩
勒邦占士洗底做「親民大帝」！向來囂爆的占士，昨日於「MVP前哨戰」失威，所屬隊伍熱火以87:103不敵雷霆之餘，更被杜蘭特攻入全場最高28分搶盡風頭，然而美媒昨日就大爆「大帝」突然轉死性，逆保安意與一眾空軍機師影相留念，大玩親民挽人氣！
雷霆球迷直豎拇指
事緣本月頭熱火飛赴波特蘭造訪拓荒者，途中要降落位於俄克拉何馬的羅杰斯機場入油，一眾球員紛紛落機前往候機大堂Hea，期間一批美國空軍機師本想上前要求合照，但卻被熱火保安人員阻止。占士見狀即刻推開保安，更主動要求地勤人員揸機，並集合隊友與班空軍合照。
事件昨日被俄城媒體《俄克拉何馬人》報道後惹來極大回響，雷霆球迷都直豎拇指大讚占士夠Nice，所以即使熱火昨日造訪雷霆，「大帝」被介紹進場時都獲得主隊球迷的熱烈掌聲。對此占士表示：「嗰啲軍人日日都身陷險境，唔係佢哋嘅付出，我哋邊有可能咁自在咁生活？偉大成咁，搵我影張相你話我點會托手（月爭）？」
占士（右）轉性玩親民，贏得不少支持。（美聯社圖片）
