波格特打跛腳都唔憂

病壞波格特為退役鋪路？職業生涯飽受傷病煎熬的澳洲中鋒波格特，因左腳足踝骨折，今季肯定不能為新東家勇士披甲。職業運動員生涯短暫，現年27歲的波格特決定未雨綢繆，不單只於家鄉墨爾本開籃球基地，辦學授徒作育英才，更撈埋經理人，大把生意，就算要提早退役，都「打跛腳」唔使憂！

貴為05年NBA新秀狀元，波格特原本有大好前程，奈何連綿不絕的傷患令這位澳洲中鋒一直未能躋身頂級球星行列。波格特本着「當你休息緊，其他人就努力搵緊銀」的座右銘，去年11月於家鄉墨爾本着手開建波格特籃球基地，為退役後作好打算。

親自落場拍片吸客

波格特籃球基地已經開始招生，場館不單擁有正規籃球場及職業訓練設施，更設有健身室、水療設備、休閒室及廚房等，樣樣齊全，跟一般大型職業球隊訓練場館無異。

「波老闆」為吸客更親力親為，受傷前拍攝了一輯宣傳短片放上網，並靠人脈託一眾美國傳媒幫忙宣傳，勁有生意頭腦。據悉，波格特又聘用了幾位專業教練長駐基地，休季期間及退役後更會親自落場傳授「武功」。

除此之外，波格特亦於停擺期間入股經理人卡達的One Management Group，撈埋經理人，手執馬刺新兵米斯、WNBA球星羅倫積遜、投球猛將夏倫及棒球手莫恩等澳洲客仔，假以時日再吸納不同國籍運動員，力求躋身星級經理人行列。

入股經理人公司

波格特場外撈到風生水起，不過其所屬球隊勇士就繼續不濟，昨日以87:90向拓荒者俯首稱臣。勇士續有尼特羅賓遜倦勤，明鬥技高一籌、昨以6分之差不敵灰熊的湖人勢成出氣對象，「紫金兵團」作客讓4.5分，上盤當然捧得過。（廣東體育周三早上10:30直播）

波格特 Andrew Bogut資多啲

出生日期：84年11月28日

國籍：澳洲

身高/體重：7呎/260磅

曾効力球隊：公鹿

威水史：學界最佳球員（05年）、NBA封波王（10/11球季）