林瘋轉擦新帥鞋

迪安東尼劈炮，「瘋潮」面臨沒落？紐約人經歷6連敗後，主帥迪安東尼毫無先兆下辭職，令一眾球員大感震驚。全美球評家、電台甚至芝加哥球迷都表示關注，並預測「林瘋」快將「停瘋」。易帥後的紐約人昨日大炒拓荒者42分反彈，林書豪轉眼間由救世主變茄喱啡，難怪J.Lin賽後急急腳擦看守教練活臣鞋自保。

迪安東尼照常出席早上操練

美國時間昨日早上，迪安東尼仍身處訓練場督操，一切看似風平浪靜，豈料下午便辭職，一眾紐約人球員獲悉後大感震驚，當中安東尼就最「爪頭」：「今朝仲同迪安東尼傾緊球隊未來方向，操完之後我返屋企瞓咗陣晏覺，瞓醒就見到部電話收到成30個訊息，嗰時先知迪安東尼辭咗職。」至於新秀森柏特亦指迪帥於操練完畢後，更向一班球員說：「See you tonight！」。

新帥愛防守 J.Lin上陣時間大減

迪安東尼辭職消息火速傳遍美國，即使本報記者昨日身處芝加哥，仍能從不同渠道收到消息。媒體及球迷所談論的焦點都圍繞林書豪，畢竟J.Lin能夠上位全靠迪安東尼帶挈；美國球評家Sam Amico就稱看守教練活臣主張防守，昔日執教鷹隊時就偏重由王牌祖莊遜單打獨鬥，預言林書豪快將失寵，安東尼將會再次擔正。

小記昨晨於芝加哥買咖啡時，與1位當地球迷Sammy Aboutalib閒聊，這位於芝加哥讀書的湖人躉表示：「林書豪唔能夠Keep住瘋狂係最大問題，依家迪安東尼唔撈，對Jeremy嘅影響肯定好大，未必可以適應新帥嘅戰術。」

迪安東尼請辭，紐約人即時重返正軌，昨於主場以121:79大炒拓荒者，當中上陣只得23分鐘的J.Lin僅得6分、6次助攻及有6次失誤，表現明顯大走樣。賽後林書豪稱「唔捨得迪安東尼」及「欠佢（迪安東尼）好多」，但亦不忘擦看守教練活臣鞋自保：「開波前個個都好傷感，但今戰反而激發起我哋嘅鬥志，我覺得活臣嘅防守戰術係今場波嘅致勝關鍵。」

人人撐迪安東尼

史杜迪米亞（紐約人前鋒）

我尊重迪安東尼的決定，紐約人球員應該要勇往直前。

法蘭克（活塞教練）

紐約人本身是個爛攤子，迪安東尼用3年半時間執靚隊波，依家辭職實在太可惜！

阿馬卡（哈佛大學教練）

迪安東尼辭職對紐約人係好大打擊，尤其是林書豪。

拿殊（太陽後衞）

迪安東尼係一位好教練，我相信佢遲早實會回歸。