商品瘋Sold專區擺賣威過高比

儘管紐約人近期戰績下滑，更有球探指林書豪不過是「中上級」球員，但「林瘋」依然愈刮愈勁，紐約體育用品店紛紛靠J.Lin吸客，當中NBA Store及Modell's罕有於店內特設多個林書豪專區，最大路的中碼Tee及球迷版波衫更出現Sold Out情況！

踏足紐約第2天，小記走訪市內多個體育用品店，發現3大名店包括FootLocker、NBA Store及Modell's已陷入一片「瘋」狂，但凡J.Lin商品定必放在黃金靚位，當中以中文「林」字紐約人Tee最受歡迎，FootLocker職員Selina表示，林書豪Tee往往被顧客「摷到亂晒」，而且去貨去得特別快！

官方商舖設4個專賣區

另邊廂NBA Store及Modell's仲大陣仗，貴為聯盟官方售賣店，NBA Store不單只將林書豪Tee及波衫放在櫥窗做生招牌，更為J.Lin特設4個專賣區，享受連熱火三巨頭、高比拜仁都沒有的天王級待遇。負責林書豪專賣區的職員Josh透露，部份J.Lin款的中碼Tee已賣到斷貨，球迷版波衫亦告售罄，不過就算球員版每件賣到250美元（約1,950美元），都一樣搶手。

至於在美國有超過140間分店的Modell's同樣「唔執輸」，儼如委任了林書豪作店鋪代言人一樣，幾乎用上3分1店舖面積擺放J.Lin商品，當店員得知小記從香港訪美，更Model上身試勻各式各樣的J.Lin商品作硬銷，期間更有大批當地球迷、中國及台灣遊客於店內掃J.Lin的Saint Patrick's Day版「O'Lin」Tee，可見J.Lin「瘋」頭一時無兩。

美國運動網站Grantland.com尋日評選「最具交易價值NBA球員」，林書豪就排第34位，評選係根據球員嘅薪水、年齡、聯盟規則同專注程度等因素決定，勒邦占士、杜蘭特同戴歷羅斯分佔前3名，J.Lin排名合唔合理就見仁見智，有東岸球探總管更加唔客氣批評林書豪喺跳投、防守同失誤上有好多問題，話佢只係「普通至中上級數嘅正選」，稱唔上係球星，睇怕一眾靠J.Lin發達嘅商家都唔會同意囉！