「林瘋」帶挈紐約人波飛加價4.9%

由於紐約人傷疲盡起，林書豪坦言近日苦練轉型，希望減少出手做真正的「PG」（控衞），如此上進，難怪紐約人亦乘勢而上，宣布下季波飛平均加幅4.9%，意圖借「林瘋」再大賺一筆！

因為實力已曝光，加上巴朗戴維斯傷愈復出，以及JR史密夫的加盟，林書豪近期上陣時間大減，數據亦大不如前，由以往得分主力，慢慢轉型為隊友「鋪橋搭路」，不過J.Lin坦言正努力適應新角色：「我依家學緊新角色，意味更少出場時間更少起手，但其實係好事，因為我可以更全面，作為控衞，我真係唔想好似之前咁一場起手咁多次。」

林書豪台灣開設訓練營

教練迪安東尼就認為：「如果你係進攻重心，起手其實好易，但如果你有其他選擇，就要學識融入其中，呢樣唔易學，但林書豪一定要學識做一個稱職嘅控衞，令其他隊友發揮更好嘅同時，自己表現都唔可以太差。」然而J.Lin目前始終仍未完全適應，明早面對馬刺的頂級控衞柏加，相信很難有突破性演出，紐約人受讓4.5分宜博對家上盤。

占士今夏到訪亞洲

雖然林書豪近期出現樽頸位，但未來仍是一片光明，紐約人亦睇中這點，宣布下季波飛加價，平均加幅4.9%。至於林書豪亦開始做更多宣傳工作，宣布繼上年後，今年暑假會再返台灣開設訓練營；至於昨日有媽媽被判打人罪名成立，被罰要進行20小時社區服務，兼捐1,000美元（約7,762港元）為海地賑災的熱火球星勒邦占士亦有樣學樣，應一間食品公司邀請，將於今夏舉行亞洲巡迴之旅，造訪中國、台灣、印度及南韓等地，相信到時會在亞洲掀起一股NBA熱潮！