「林失眠症」玩謝紐約人

「林瘋」效應有副作用？繁華的紐約被稱為不夜城（The City that Never Sleeps），豈料連紐約人球員都徹夜不眠！隨着林書豪大爆發帶動全美「瘋」狂，一眾紐約人球員經歷連場激戰過後更High到集體失眠，要睇醫生尋求入睡良方。J.Lin產生「林失眠（Linsomnia）」副作用令隊友「冇覺好瞓」，但若果失眠可以換來勝利，「瞓少啲」都無相干啦！

多得「林瘋」效應，麥迪遜廣場公園幾乎場場爆滿，上仗紐約人反勝騎士一戰振奮人心，主場球迷嘈到拆天，紐約人球員亦High到腎上腺素飆升，搞到集體失眠。近期Hit爆的3分射手盧雲克日前接受WFAN電台訪問時透露：「完場之後沖埋涼，通常我哋都係半夜先離開麥迪遜廣場公園，幾乎全隊球員返到屋企都瞓唔着，因為實在太High嘞！」

盧雲克：贏波唔介意冇得瞓

據悉，紐約人會方特別請來醫生睇症，一眾「林失眠病患者」亦非常聽話，臨瞓前聽取醫生建議飲熱牛奶、花草茶、數綿羊及換床單等，甚至不斷聽由醫生燒錄的減壓CD，希望「有覺好瞓」，之不過盧雲克就表示：「唔知醫生套建議Work唔Work，但如果紐約人繼續贏，遲啲先瞓着甚至唔瞓都係值得。」

今訪「綠軍」轉任得分後衞

無睡意紐約人今晚造訪塞爾特人，昨日教練迪安東尼於操練時「試新嘢」，打造「巴林組合」，以巴朗戴維斯夥拍林書豪鎮守後場，消息更指J.Lin或會轉型擔任得分後衞，巴朗戴維斯坦言此舉可減輕「林瘋」負擔之餘，又可創造更多機會給安東尼及史杜迪米亞起手，新戰術隨時令「綠軍」防不勝防，紐約人受讓2.5分下盤捧得過。（now635台周一凌晨2:00直播）

由於哈佛大學位處波士頓，今場比賽被傳媒視為林書豪「回家之旅」。據最新門票價格，平均每張要267美元（約2,071港元），比起J.Lin首戰塞爾特人時，上升過百美元。