賽前寸占士未夠班 高比起晒「火」撐湖人

「湖熱戰」周一凌晨爆發，焦點將落在高比拜仁及韋迪身上，事關「閃電俠」於全明星賽打爆「小飛俠」個鼻，洛杉磯傳媒已提醒韋迪要「睇路」，加上高比賽前突然寸爆勒邦占士未夠班，這場冠軍前哨戰未開波已充滿火藥味！（now635台周一凌晨4:30直播）

洛杉磯傳媒提醒韋迪「睇路」

高比於全明星賽遭韋迪粗野侵犯，導致鼻骨骨折兼腦震盪，如今「小飛俠」慘變「面具俠」，洛城傳媒昨日就提醒「閃電俠」要小心，皆因一眾湖人球員將以牙還牙，為「大佬」高比報仇，並預言湖人Fans會全力噓爆韋迪。

另一犯眾憎目標占士，繼全明星賽累東岸明星隊飲恨後，昨日又做縮頭龜，卸膊逃避投射最後一擊，卒之連累熱火以98:99不敵爵士。占士「冇吉士」，難怪不被高比放在眼內：「我嘅目標係追逐米高佐敦同魔術手莊遜嘅成就，勒邦係咪我宿敵？佢未夠班同我鍊！」

高比昨日怒轟38分率領湖人以115:107砌低帝王，加上「紫金兵團」今季主場錄15勝2負佳績，今戰受讓2.5分，下盤當然捧得過。