韋斯黐富婆奀星變鳳凰
奀星變鳳凰，韋斯（Delonte West）上位速度媲美林書豪！J.Lin未爆紅前要瞓梳化，小牛後衞韋斯就因為窮到燶連梳化都冇得瞓，要淪落到在小牛更衣室過夜！停擺期間撈過傢俬舖，又冇錢帶阿囝睇醫生，韋斯決定「拋個身出嚟」，繼與勒邦占士阿媽傳過緋聞後，日前再被踢爆玩忘年戀搭上富婆，誓要飛上枝頭脫貧！
並非每位NBA球員都身家豐厚，曾効力騎士的小牛奀星韋斯「周身冇蚊」，縱然職業生涯賺取超過1,400萬美元波糧，但卻因與前妻打官司及投資失敗散盡家財。早於今季停擺期間，韋斯就透過Twitter求救，希望有心人能借錢給他帶愛兒睇醫生，繼而又上載自己到傢俬舖打工的相片，並變賣汽車及球衣，可謂窮途末路。
韋斯昨日向《達拉斯新聞網》爆料：「因為我有犯罪紀錄（09年違例藏械及違例駕駛被捕），所以冇業主肯租樓畀我，小牛作客打波都話有酒店瞓，但主場賽事我就無家可歸，焗住要喺更衣室過夜。」消息一出，小牛班主古班立即吩咐朋友安置韋斯，令後者有個安樂窩。
熱火要搵拓荒者洩憤
住屋問題得到解決，韋斯下一步就要「搵油水」。小牛昨日主場以92:93不敵籃網，賽後韋斯受訪時雖否認曾搭上勒邦占士母親哥莉亞，但美媒《Terezowens》指韋斯仍未搣甩鋪「煲老藕」癮，近日更於夜店與1位富婆「撻着」，密謀食軟飯掠番筆。
「占媽」與韋斯的一段情疑幻疑真，阿仔勒邦占士拒為事件作評論，專心打波爭冠軍指環最實際。「大帝」於明星賽孭鑊累輸波，明早定必找拓荒者發洩，熱火作客讓7.5分一於捧上盤。（廣東體育周五早上11:30直播）
小牛不敵籃網之戰，易建聯（左）只得4分進帳。（美聯社圖片）
