垃圾入樽賽一味抄橋 全城炮轟：盡快摺埋！
史上至削入樽賽誕生至茄入樽王！長久以來，入樽賽都是NBA全明星周末的重頭戲之一，不過隨着格芬及勒邦占士等鋤樽好手耍手擰頭，昨日入樽賽僅靠4位「茄喱啡」擔大旗，結果爵士大後備謝路美伊雲斯一味靠抄奪得入樽王殊榮，惹來全城劣評，球迷、球星紛紛炮轟參賽者創意欠奉兼奄悶，呼籲入樽賽應該盡快「摺埋」！
今屆入樽賽抄襲成風，幾位奀星的鋤樽技術亦明顯未到家，當中布丁加就模仿92年太陽名將些巴路斯的蒙眼入樽，保羅佐治的右手入樽、左手貼貼紙亦明抄杜域侯活，全無新意可言。至於木狼新秀戴歷威廉士就最(火羅)，第3輪幾乎炒足10次樽，最終因時間無多惟有「求其」鋤樽了事。
布丁加賴姚明唔幫拖
不足一周前才獲補選參賽的謝路美伊雲斯，於第2輪跳過隊友希禾特之後連環鋤樽，繼而在第3輪穿上馬龍戰衣施展「郵差式」入樽，雖然一味抄橋，卻在300萬張選票中獲29%支持率榮膺入樽王。這位今季場均只為爵士上陣5.6分鐘的「大茄」表示：「我只係用咗3個鐘備戰，能夠參加入樽賽仲要贏埋，真係不可思議！」另邊廂傳會飛過「小巨人」1:1紙牌鋤樽的布丁加，就似乎想賴姚明「唔幫拖」才導致落敗：「本來想唔飛紙牌飛真人嘅，但係姚明嚟唔到，佢話有嘢做，咁有咩計啫？」
JR史密夫：好心聯盟咪再搞
卡士、創意及娛樂性均欠奉，今屆入樽賽劣評如潮，紐約人球星JR史密夫透過Twitter表示：「觀眾唔係想睇呢啲入樽，今次可以話係有史以來最垃圾嘅入樽賽，好心聯盟就咪再搞啦。」不少球迷亦於討論區留言，希望聯盟「摺埋」入樽賽，更笑稱：「冇嘥時間睇入樽賽直播嘅球迷先係大贏家！」
保羅佐治熄燈入樽算叫有創意。（法新社圖片）