一場新秀賽兩個「MVP」 林書豪享總裁級待遇
全明星周末昨日假奧蘭多開騷，打頭陣的新秀賽因林書豪變得不平凡，這位美籍華裔新星人氣爆燈獲星級厚待，賽前獲聯盟罕有地安排個人記者會之餘，更被總裁史端激讚上位效應勁過米高佐敦！地位媲美總裁、爆過「波神」，難怪昨日J.Lin「Hea打」不足9分鐘，「瘋」頭依然蓋過MVP艾榮，1場新秀賽打造兩位「MVP」，史端果然有計！
新秀賽焦點林書豪昨日令球迷大失所望，這位紐約人新星為免因連場激戰「爆偈」，主動向總經理奧尼爾要求「打少啲」：「紐約人近20日打咗14場比賽，我真係身心俱疲，希望能夠喺明星賽期間好好休息。」結果如林書豪所願，昨仗他只上陣8分55秒，除了開波初段助攻格芬「拆你屋」後便告「隱形」，全場僅貢獻2分及1次助攻。
歷代新星都「Hea打」新秀賽
之不過上陣時間少反而凸顯J.Lin地位超然，皆因近年極速上位的新星如格芬及戴歷羅斯，都曾經於新秀賽「Hea打」。反觀今季狀元艾榮雖然攻入全場最高34分及9次助攻，包括3分球8射全中，協助巴克利隊以146:133擊敗奧尼爾隊兼獲選為賽事MVP，但風頭都始終不及「林瘋」。
熱潮爆發勁過當年佐敦
由於來自亞洲的傳媒眾多，聯盟於新秀賽前破天荒為J.Lin召開記者會，對上一位兼唯一於全明星周末期間舉行個人記招的，正是史端本人，證明「林瘋」有幾巴閉。史端賽前表示：「環顧體壇，我諗根本冇1個運動員能夠爆發咁犀利嘅效應，J.Lin呢股熱潮仲爆過當年嘅米高佐敦！」
一向識做宣傳的史端，昨日率領林書豪及菲爾斯等球星「出巡」，參加「NBA Cares」的關懷活動，期間J.Lin被電動螺絲鑽考起，鞏固圍欄時顯得雞手鴨腳，大汗疊細汗，惹笑場面又再謀殺傳媒菲林。艾榮場內做主角攞彩，林書豪亦憑超強人氣贏盡愛戴，今次新秀賽可算誕生了兩位MVP，大家都一樣最有價值！
林書豪（左）表現輕鬆，全無壓力。（法新社圖片）
林書豪幫人整屋，但就畀個電鑽考起。（美聯社圖片）