美女拳手伊藤揪得更睇得

冇人鍾意畀人打，偏偏呢期日、韓、台有班網民身痕，居然想做一個o靚妹嘅沙包，理由係佢超靚，佢叫伊藤沙月，係目前日本人氣最勁嘅「美人拳手」！

伊藤沙月唔係酒吧嘅拳手，係個好打得嘅拳手嚟o架。只得20歲嘅佢，贏過日本高中拳擊比賽輕蠅量級（48公斤以下）女子冠軍，被視為未來有機會進軍「世界一」（世界冠軍）嘅新生代，更加入選埋日本倫敦奧運強化選手計劃添，有機會參加首次設立嘅奧運女子拳賽o架。

高中學拳擊阿媽竟贊成

呢個宮崎縣出生嘅大學二年級靚女，到底有冇份參加奧運仲未明朗，但係呢一年嚟佢就人氣急升，電視、報紙搶住同佢做訪問，事關輪廓秀美、有對大眼睛嘅沙月，係真正嘅打得又睇得，日本網民形容佢「靚到過晒火位」，韓國啲體育網站有佢嘅圖片專頁，至頂癮係有網友仲留言話，畀佢打爆鼻都心甜，認真犯賤。

2010年入咗拓殖大學嘅沙月，點解會鍾意咁暴力嘅運動呢？原來佢睇過K1 World Max綜合格鬥比賽之後，就立志想做「日本一」，而且覺得做拳手「好型」，所以當佢升讀日章學園高校之後，就畀人游說加入拳擊部，放棄咗自己一直玩開嘅籃球。

其實加入拳擊部之前，沙月都驚家人反對，點知佢一講，阿媽居然冇Say No，只係講句：「試吓囉！」沙月呆咗，反問阿媽：「你贊成？」佢阿媽就答：「加油啊！」就咁，沙月就响高中開始練拳。

為咗練拳擊，沙月捱咗唔少苦，每朝5點半起身返學練體能，放學練拳法基本功、跑步固然辛苦，仲試過左右手腕甩骹，上堂痛到連鉛筆都揸唔到……

不過沙月最苦惱嘅，反而係每逢賽前要Keep磅，佢唔單只要「禁肉」，餐餐用菜做主食，仲要戒食最鍾意嘅朱古力，佢話：「冇得食零食，真係好辛苦。」畢竟，佢仲係個天真嘅細路女。

全名：伊藤沙月（Satsuki Ito）

出生日期：1991年6月21日

年齡：20歲

身高：1.64米

就讀大學：拓殖大學

曾獲榮譽：全日本高中拳擊比賽女子輕蠅量級（Light Fly）冠軍

拿手絕招：右鈎拳