4大超級碗創意廣告搞笑性感乜都有

超級碗貴為舉世矚目盛事，全球球迷的眼球均聚焦這場大戰，廣告商當然想爭取曝光，70間以重金買到廣告時間的各國大機構，為突圍而各出奇謀，廣告主題五花百門，有搞笑、有性感、有劇情，有荷蘭傳媒就精選4大超級碗創意廣告，當中Honda及Volkswagen的廣告在YouTube的點擊率已逾1,000萬次！

Career builder玩埋猩猩

呢間芝加哥公司搵咗隻大猩猩，着晒老西扮公司總裁請人，然後全程玩殘個員工，內容抵死，據聞呢個廣告使咗400萬美金至有得出街，但係美國幾間動物園同動物保護組織，就插佢哋危害瀕危動物，要求唔好再播。

Teleflora齋賣靚太

這間著名網上送花公司，去年在超級碗決賽的意淫廣告引起爭議，今年則以靚女作賣點，請來巴西超級名模利馬性感亮相，這名前NBA球星查歷的妻子過往在多個「體壇靚太」選舉中名列前茅，一眾球迷對她絕對受落。

Volkswagen巨狗瘦身

一隻經常喺屋企攤抖嘅巨狗有次想追車，點知籮柚太大，捐唔過個狗窿，結果佢的起心肝減肥：行樓梯、玩跑步機、健身球、游水……乜都齊，成功瘦身，終於出到門口同架車鍊番轉。減緊肥嘅你，一定有共鳴。

Honda中國元素

講個主角曠工揸住架CRV四圍遊，最尾去到唐人街路口，發現啲中國人喺度慶祝緊農曆新年，於是乎落車玩埋一份，仲走上台唱國語歌《恭喜你》，夠晒中國特色。但係……似乎放响大陸播好過喺美國喎！