占士 格芬縮沙唔玩入樽賽

神又係佢,鬼又係佢!說的是勒邦占士!「大帝」交出「準三雙」,助熱火作客以99:79燒傷76人,兼破高比拜仁紀錄成最年輕18,000分先生,然而占士轉過頭又食言,聯同格芬齊齊宣布不玩今屆入樽賽,可能益了格芬的快艇隊友迪安迪佐敦榮升新一屆入樽王!

「大帝」做最年輕萬八分先生

吸取上場對公鹿拿下40分,仍累熱火輸波的教訓,勒邦占士昨日對76人專注防守及組織,結果成功帶起球隊,在第4節客串控球後衞,更助球隊打出一段15:0的攻勢奠定勝局。

全場拿下19分、12個籃板及8次助攻的「大帝」,賽後更以27歲36日,成為NBA史上最年輕拿到18,000分的球員,將高比拜仁保持的舊紀錄足足推前了1年120日,明早帶領熱火作客出戰近況頹勢的速龍,就算讓12.5分上盤仍值追。

格芬大讚「佐敦」入樽勁

然而剛與高比拜仁分列NBA首月(因今季NBA停擺,首月橫跨12月至1月)東西岸最佳球員、日前放言有意參加今屆入樽賽的勒邦占士,賽後卻反口表示不會參加入樽賽:「如果我參加,就一定要贏,唔係咪嘥咗個周末?」更估不到的是,快艇球星格芬同時間亦宣布不作衞冕:「其實好多球員入樽都好勁,上年太忙喇,今年我想休息多啲!」

有記者立即問格芬有否人選推介,結果這名入樽王推舉了快艇隊友迪安迪佐敦:「佐敦入樽好勁,我相信球迷一定鍾意睇。」

事實上,迪安迪佐敦本人亦表明有興趣參加,但就提出一個要求:「一定唔可以對格芬!」

占士(左)唔玩入樽賽實令唔少Fans失望。(美聯社圖片)