占士眼紅玩入樽賽
「入樽王」格芬變公敵？大前日憑着一記世紀鋤樽威震體壇的格芬，突然成為眾矢之的，「受害者」柏堅斯避開他、杜蘭特寸他，就連「大帝」勒邦占士亦擔心Icon地位不保，昨日表態有意參加本月舉行的入樽賽Show Quali，誓要挑戰格芬的「入樽王」寶座！
年度盛事NBA「全明星賽周末」本月25日在奧蘭多展開，重頭戲乃星光熠熠的東西岸明星賽，不過由格芬孭重飛的入樽賽同屬焦點。該名快艇球星去屆施展飛車入樽勇奪殊榮，本周二又憑一記世紀鋤樽搶盡風頭，眼見後輩爆紅，熱火王牌占士當然「唔抵得」，昨日突然向格芬宣戰！
「大帝」表示：「查實我年年都想玩，但次次都因傷縮沙，諗諗吓唔少偉大球員都參加過入樽賽，睇嚟今年真係要同格芬決一高下。」不少球迷及傳媒均指聯盟捧格芬捧到出面，一旦占士決定參賽，兩王雙遇必有一番惡鬥。
柏堅斯避冷嘲刪Twitter帳戶
至於慘被格芬落面的雷霆中鋒柏堅斯，自成為世紀鋤樽「受害者」後，連日來不斷被球迷冷嘲熱諷，柏堅斯疑抵受不住輿論壓力，昨已剷除Twitter帳戶避風頭。隊友被羞辱，杜蘭特亦「睇唔過眼」公然寸爆格芬：「我一啲都唔欣賞呢球入樽喎，搏埋犯規入埋罰球咪又係攞3分，有乜大不了？」
重整旗鼓的雷霆昨日重新上路，憑雙子星杜蘭特及韋斯布克合力轟入56分，加上已報名參戰入樽賽的伊巴卡交出10次封阻，協助球隊以95:86砌低小牛，明早主場面對客場表現一般的灰熊，讓到10.5分上盤一樣捧得過。
格芬（中）尋日又攻入31分，協助快艇擊敗爵士。（美聯社圖片）
