飛鷹劉健明水底求婚大成功

「水底」求婚大作戰！効力甲一籃球隊飛鷹的大前鋒劉健明，與模特兒女友余曉彤（Hidy Yu）拍拖5年，兩人雖曾因為雜誌緋聞而情海翻波，但雙方的信任及愛排除了一切障礙，「籃板明」更在菲律賓籌備了一場心思十足的求婚好戲，於水底「逼婚」，贏得美人歸！

靚仔靚女無本心？未必！劉健明及余曉彤出名是籃球壇的模範情侶，5年零4個月愛情長跑經歷了不少風浪，然而兩人依然「打風都打唔甩」，用行動證明這段感情不是「玩玩吓」。雖然在Hidy眼中，劉健明從來都不是浪漫男友，但早前兩人到菲律賓旅行時，「籃板明」卻出乎意料地浪漫。

突然浪漫Hidy感動到喊

Hidy表示：「一直都唔知佢有個咁嘅計劃，當我哋潛入水底，佢突然跪低拎隻戒指出嚟，仲攞住個寫住『嫁給我』嘅牌。嗰一刻真係好想喊，但另一方面又覺得佢好奸茅，因為喺水底講唔到嘢，唔可以『Say No』，惟有接受囉！」

知足夫婦打波潛水夠Happy

本身是田徑好手的余曉彤，形象健康又性感，自然深受不少宅男歡迎。被問到會否因為求婚行動影響「未來劉師奶」的事業，「籃板明」坦言未驚過：「佢唔做嘢都得，我可以養佢！」錢不是萬能，Hidy指他們都是知足常樂的人，從不追求大富大貴，閒時能去踩單車、打波、潛水已夠開心一整天。

劉健明憶述當時自己事業未有成，但Hidy亦未有嫌棄，並一直給予自己鼓勵，一切都很難忘。有情人終成眷屬，劉健明及余曉彤結束5年愛情長跑，娶得美人歸的「籃板明」只有一句說話想講：「我愛妳！余曉彤！」

圖/文：Binlo子文（部份相片由受訪者提供）