郭灝霆全面彈起

2011年話咁快就過去，又到頒發今年本地體壇成績表的時候喇！今年本地體壇可算大豐收，全因各項目均有新人湧現。不過眾多新星入面，最具人氣莫過於年初繼師兄黃金寶後，勇奪場地單車世界冠軍的郭灝霆。Marco能撐過多次低潮修成正果，榮登2011「新人王」，背後原來全靠「廿四孝」父母支持，所以Marco老套都要學頒獎禮明星講番句：「多謝阿爸阿媽！」

郭灝霆為家中獨子，自小溫室長大雖然未知人間疾苦，但有「大喊包」之稱的他，卻偏偏選擇單車這條被外界形容為極苦之路。由多次斷骨、09年全運失利「喊足全場」、捱至今年終奪世界場地單車錦標賽男子15公里捕捉賽金牌，全因Marco有「廿四孝」父母無限量包容：「細個其實一直都想做消防員，但初中時開始真正踩單車就放棄了這兒時夢想，初時都唔鍾意踩，但到有成績時慢慢就愛上了，家人一直都無反對過。」

靠whatsapp同父母溝通

Marco父母多年來一直在背後默默支持，訪問當天郭爸爸及郭媽媽亦在場，問及點睇囝囝的成就，二人異口同聲說：「佢鍾意就得啦！」郭爸爸更笑笑口話：「佢讀書又唔叻，細個教佢好勞氣，難得佢搵到自己鍾意嘅運動，我哋當然支持，如果唔鍾意，我逼佢踩都無用。」

02年加入港青，至06年Marco轉任全職運動員，家人從無半句怨言，郭爸爸甚至為他轉校至鄰近體院的林大輝中學，方便乖仔踩車：「林大輝當時剛開校，講明會培育時裝設計及運動員，又近佢放學到體院練習。」兩位「廿四孝」父母更加學用「whatsapp」，與長年累月不在港的囝囝溝通，郭媽媽說：「我哋事無大小都會send whatsapp畀佢，甚至食碗飯都影畀佢睇，等佢覺得我哋距離無咁遠，踩車都可以專心啲。」

二人細心安排Marco的單車之路，終於為他換來世界冠軍名銜，Marco笑稱老竇目前依然在「彩虹上飄飄然」；郭爸爸回憶囝囝成為世界冠軍一晚就說「嚇餐飽」：「佢比賽當晚，我們瞓至半夜突然收到張敬煒來電，問我係咪郭灝霆爸爸，之後就線路問題cut咗線，我們還以為他又炒車，點知後來收到佢電話報喜，我們成晚又驚又喜，成晚都瞓唔着。」

上堂瞓到流口水

除有「廿四孝」父母為他提心吊膽，Marco自中四從伍華中學轉校至林大輝中學，其彩虹之路，母校亦付出不少，Marco更曾擁「私家車房」：「當時我朝早練完車先返學，每日都要拎住架單車，學校校工特別為我開間士多房放單車；上堂又因為早起唔夠精神成日都瞓着，老師有時都好體諒我，間中我瞓到流口水，同學仲放張紙巾喺我嘴邊，好體貼o架！哈哈！」Marco今年奪世界冠軍後，更獲母校以「灝霆室」將他昔日的課室命名，校內師弟妹都以「郭灝霆接班人」為目標，延續「黃金寶年代」的單車傳奇。Marco從屋企、走到校園，甚至在單車場上都深受愛戴，成為「新人王」實至名歸啦！

認識郭灝霆

Marco Kwok

出生日期：1988年2月26日

身高/ 體重：174cm/ 62kg

單車之路

02年透過體院「明日之星計劃」加入港隊

06年中五畢業，成全職運動員。

08年日本亞錦賽奪五項全能賽亞軍、夥拍黃金寶奪麥迪遜賽冠軍

08年世界盃場地錦標賽墨爾本站奪捕捉賽冠軍

09年全國個人公路賽賽季軍、全國場地賽夥拍黃金寶奪麥迪遜賽冠軍

09年印尼亞錦賽五項全能賽冠軍、夥拍黃金寶奪麥迪遜賽冠軍

09年世界盃場地賽曼徹斯特站奪記分賽亞軍

09年香港東亞運個人公路賽銅牌

10年世界盃北京站麥迪遜賽冠軍、記分賽亞軍

10年杜拜亞錦賽奪記分賽季軍、團體4公里追逐賽季軍

10年廣州亞運團體追逐賽銀牌

11年荷蘭世錦賽場地捕捉賽冠軍